UKUPHILA OKUKHULU
“Ukuthula ngikushiya kini, ukuthula kwaMi ngininika khona: . . . Inhliziyo yenu mayingakhathazeki.”
NgokukaJohane 14:27
Noma nini lapho into iba nzima ekuhlangenwe nakho komuntu siqu, sisengozini yokusola uNkulunkulu, kodwa yithina esisephutheni, akusiye uNkulunkulu, kukhona ukuphambuka okuthile endaweni ethile esingafuni ukukudedela. Masinyane lapho sikudedela, konke kuba sobala njengokukhanya kwemini. Uma nje sizama ukukhonza izinjongo ezimbili, thina uqobo noNkulunkulu, kuba khona ukudideka. Isimo sengqondo kumelwe sibe ngesokuthembela ngokuphelele kuNkulunkulu. Uma sesifikile lapho, akukho lutho olulula njengokuphila ukuphila kongcwele; ubunzima buqala lapho sifuna ukuphanga igunya loMoya oNgcwele ngenxa yezinjongo zethu.
Noma nini lapho ulalela uNkulunkulu, uphawu lwaKhe luhlala luwukuthula, ubufakazi bokuthula okujule ngokungenakulinganiswa, okungesikho okungokwemvelo, kodwa ukuthula kukaJesu. Noma nini lapho ukuthula kungafiki, linda kuze kufike noma uthole isizathu sokuthi kungani kungafiki. Uma wenza ngokuthatheka, noma ngomuzwa wobuqhawe, ukuthula kukaJesu ngeke kufakaze; akukho bulula noma ukwethemba uNkulunkulu, ngoba umoya wobulula uzalwa nguMoya oNgcwele, hhayi yizinqumo zakho. Isinqumo ngasinye siletha ukusabela kobulula.
Imibuzo yami ifika njalo lapho ngiyeka ukulalela. Lapho ngilalele uNkulunkulu, izinkinga azilokothi zingene phakathi kwami noNkulunkulu, zifika njengezinto zokuphenya ukuze zigcine ingqondo iqhubeka ngokumangala ngesambulo saNkulunkulu. Noma iyiphi inkinga engena phakathi kukaNkulunkulu nami ivela ekungalalelini; noma iyiphi inkinga, futhi ziningi, ehambisana nami lapho ngilalela uNkulunkulu, yandisa injabulo yami echichimayo, ngoba ngiyazi ukuthi uBaba waMi uyazi, futhi ngizobuka ngibone indlela axazulula ngayo le nto.