UKE WAPHAZAMISEKA NA?
“Ukuthula ngikushiya kini, ukuthula kwaMi ngininika khona.”
NgokukaJohane 14:27
Kunezikhathi lapho ukuthula kwethu kusekelwe ekungazini, kodwa lapho sivuka sibone amaqiniso okuphila, ukuthula kwangaphakathi akunakwenzeka ngaphandle kokuba kwamukelwe kuJesu. Lapho iNkosi yethu ikhuluma ngokuthula, idala ukuthula, amazwi aKhe ahlala "engumoya nokuphila." Ngake ngakwamukela yini lokho uJesu akukhulumayo? "Ukuthula kwaMi ngininika khona" — kungukuthula okuvela ekubhekeni ubuso baKhe nasekuqapheleni ukungaphazamiseki kwaKhe.
Ingabe uphazamiseke kabuhlungu manje, uxakeke ngenxa yamaza namagagasi alokho uNkulunkulu akuvumele ngokuhlinzeka kwaKhe, futhi ngemva kokuba, njengokungathi, uphendule amadwala amakhulu enkolelo yakho, awukawutholi yini umthombo wokuthula noma wenjabulo noma wenduduzo; ingabe konke kuyihlane? Khona-ke bheka phezulu wamukele ukuzola okungaphazamiseki kweNkosi uJesu. Ukuthula okubonakala kuwe kuwubufakazi bokuthi usebudlelwaneni obulungile noNkulunkulu ngoba ukhululekile ukuphendulela ingqondo yakho kuYe. Uma ungekho ebudlelwaneni obulungile noNkulunkulu, awunakuyiphendulela kwenye indawo ingqondo yakho ngaphandle kuwe uqobo. Uma uvumela noma yini ikufihlele ubuso bukaJesu Kristu, uyaphazamiseka noma unesivikelo samanga.
Ingabe ubheke kuJesu manje, kule ndaba ekucindezelayo futhi wamukela ukuthula kuYe? Uma kunjalo, Yena uyoba yisibusiso esinomusa sokuthula ngaphakathi kuwe nangokusebenzisa wena. Kodwa uma uzama ukuyixazulula ngokukhathazeka, umsusa emehlweni futhi ufanelwe yikho konke okutholayo. Siyaphazamiseka ngoba besingacabangi ngaYe. Lapho umuntu ebonisana noJesu Kristu ukudideka kuyasuka, ngoba Yena akanakho ukudideka, futhi okuwukuphela kokusikhathazayo ukuhlala kuYe. Kwendlale konke phambi kwaKhe, futhi lapho ubhekene nobunzima, ukushonelwa nosizi, muzwe ethi, "Inhliziyo yakho mayingakhathazeki."