IMFUNDISO NGONKULUNKULU EPHILAYO

Qaphela ukuba ungahluleki ukwenza lokho okubona ezikhathini zakho entabeni noNkulunkulu. Uma ungakulaleli ukukhanya, kuyophenduka ubumnyama. "Ngakho uma ukukhanya okukuwe kungubumnyama, yeka ubukhulu balobo bumnyama!" Lapho nje uwubekela eceleni umbuzo wokungcweliswa noma enye into uNkulunkulu akukhanyisela ngayo, uqala ukuba nokubola okomile ekuphileni kwakho komoya. Qhubeka ulethe iqiniso libe ngokoqobo; lisebenzise kuyo yonke imikhakha, kungenjalo khona ukukhanya onakho kuyoba yisiqalekiso.

Umuntu okunzima kunabo bonke ukubhekana naye yilowo owaneliseka ngokuzidla ngokuhlangenwe nakho angabhekisela emuva kukho, kodwa ongakubonakalisi ekuphileni okungokoqobo. Uma uthi ungcwelisiwe, kubonise. Lokho okuhlangenwe nakho kumelwe kube ngokweqiniso kangangokuthi kubonakale ekuphileni. Qaphela noma iyiphi inkolelo ekwenza uzitike; ivela emgodini, kungakhathaliseki ukuthi izwakala iyinhle kangakanani.

Imfundiso ngoNkulunkulu kumelwe ibonakale ebudlelwaneni obungokoqobo kunabo bonke. "Ngaphandle kokuba ukulunga kwenu kudlule ukulunga kwababhali nabaFarisi . . ." kusho iNkosi yethu, okungukuthi, kumelwe ube nesimilo esihle kakhulu kunomuntu onesimilo esihle kunabo bonke omaziyo. Kungenzeka wazi konke ngemfundiso yokungcweliswa, kodwa uyayibonakalisa yini ezindabeni ezingokoqobo zokuphila kwakho? Yonke ingxenye yokuphila kwakho, eyomzimba, eyokuziphatha nengokomoya, kumelwe yahlulelwe ngendinganiso yomsebenzi wokubuyisana.