"MINA NGEMPELA . . . KODWA YENA"
“Mina ngempela nginibhapathiza ngamanzi . . . kodwa Yena uyakunibhapathiza ngoMoya oNgcwele nangomlilo.”
NgokukaMathewu 3:11
Ingabe sengike ngafika eqophelweni ekuhlangenwe nakho kwami lapho ngingathi khona — "Mina ngempela — kodwa Yena"? Uze ufike lowo mzuzu, angisoze ngazi ukuthi kusho ukuthini ukubhapathizwa ngoMoya oNgcwele. Mina ngempela sengifike ekupheleni, akukho engingakwenza: kodwa Yena uqala khona lapho — Yena wenza izinto okungekho omunye ongazenza nanini. Ngikulungele yini ukuza kwaKhe? UJesu akanakuza uma kusekhona noma yini emvimbayo kungaba ukulunga noma ububi. Lapho efika ngikulungele yini ukuba adonsele ekukhanyeni zonke izinto ezimbi engizenzile? Yilapho kanye efika khona. Nomaphi lapho ngazi ukuthi ngingcolile, uyobeka izinyawo zaKhe khona; nomaphi lapho ngicabanga ukuthi ngihlanzekile, uyozisusa.
Ukuphenduka akulethi ukuqaphela isono, kodwa ukuqaphela ukungafaneleki okungenakuchazwa. Lapho ngiphenduka, ngiyaqaphela ukuthi angikwazi ngokuphelele ukuzisiza; ngiyazi ngenhliziyo yami yonke ukuthi angifanele ngisho ukuthwala izicathulo zaKhe. Ingabe sengiphenduke ngaleyo ndlela? Noma ingabe kusekhona ukusikisela okusalile kokuzivikela? Isizathu sokuba uNkulunkulu angakwazi ukungena ekuphileni kwami ukuthi angikafinyeleli ekuphendukeni okuphelele.
"Yena uyakunibhapathiza ngoMoya oNgcwele nangomlilo." UJohane akakhulumi ngokubhapathizwa ngoMoya oNgcwele njengokuhlangenwe nakho, kodwa njengomsebenzi owenziwa nguJesu Kristu. "Yena uyakunibhapathiza." Okuwukuphela kokuhlangenwe nakho abakuqaphelayo labo ababhapathizwa ngoMoya oNgcwele kuwumuzwa wokungafaneleki ngokuphelele.
Mina ngempela ngangiyilokhu nalokhuya; kodwa Yena wafika, kwase kwenzeka into emangalisayo. Fika emkhawulweni lapho Yena enza khona konke.