LOKHU KUHLANGENWE NAKHO KUMELWE KUFIKE
“Futhi akabange esambona.”
2 AMakhosi 2:12
Akukubi ukuncika ku-Eliya uma nje uNkulunkulu esakunika yena, kodwa khumbula ukuthi siyofika isikhathi lapho kuyodingeka ahambe; lapho engasemi phambi kwakho njengomqondisi nomholi wakho, ngoba uNkulunkulu akahlose ukuba aqhubeke enjalo. Uthi — "Angikwazi ukuqhubeka ngaphandle kuka-Eliya." UNkulunkulu uthi kumelwe uqhubeke.
Uwedwa eJordani lakho.
ivesi 14. IJordani iwumfanekiso wokuhlukaniswa lapho kungekho buhlobo nanoma ubani omunye, nalapho kungekho muntu ongakuthathela umthwalo wemfanelo. Manje kumelwe ukuvivinye lokho owakufunda lapho uno-Eliya wakho. Uye eJordani kaninginingi no-Eliya, kodwa manje ubhekene nalo uwedwa. Akusizi ukusho ukuthi awukwazi ukuhamba; lokhu kubhekana sekufikile, futhi kumelwe uhambe. Uma ufuna ukwazi ukuthi uNkulunkulu unguNkulunkulu okholwa ukuthi unguYe, khona-ke dlula eJordani lakho uwedwa.
Uwedwa eJeriko lakho.
ivesi 15. IJeriko yindawo lapho obone khona u-Eliya wakho enza izinto ezinkulu. Lapho ufika eJeriko awuthandi neze ukuthatha isinyathelo nokuthembela kuNkulunkulu, ufuna omunye umuntu akwenzele. Uma uhlala uthembekile kulokho owakufunda no-Eliya, uyothola uphawu lokuthi uNkulunkulu unawe.
Uwedwa eBethele lakho.
ivesi 23. EBethele lakho uyozithola ususekupheleni kwamasu akho nasekuqaleni kokuhlakanipha kukaNkulunkulu. Lapho ufika ekupheleni kwamasu akho futhi uzizwa uthambekele ekunqotshweni ukwethuka, ungakwenzi; hlala uthembekile kuNkulunkulu khona Yena eyoveza iqiniso laKhe ngendlela eyokwenza ukuphila kwakho kube yisakramente. Sebenzisa lokho owakufunda no-Eliya wakho, sebenzisa ingubo yakhe uthandaze. Zimisele ukuthembela kuNkulunkulu futhi ungabe usamfuna u-Eliya.