IMFIHLO YOKUKHOLWA
“Wathi, Ungubani Wena, Nkosi?”
IZenzo 9:5
Ngesimangaliso sokuhlengwa uSawulu waseTarsu waguqulwa ngomzuzwana owodwa esuka ekubeni ngumFarisi onentando eqinile, nonentshiseko waba yisigqila seNkosi uJesu esithobekile, nesizinikele.
Akukho lutho oluyisimangaliso ngezinto esingazichaza. Siyakwazi ukubusa lokho esikwazi ukukuchaza, ngakho kungokwemvelo ukufuna ukuchaza. Akukhona ngokwemvelo ukulalela; futhi ukungalaleli akusona njalo isono. Akukho ukulunga kokuziphatha ekulaleleni ngaphandle kokuba kulowo onikeza umyalo kuqashelwa igunya eliphakeme. Kungenzeka kube ukukhululwa komunye umuntu uma engalaleli. Uma umuntu ethi komunye — 'Kumelwe,' futhi — 'Uyokwenza,' wephula umoya womuntu futhi uwenze ungamfaneli uNkulunkulu. Umuntu uba yisigqila ngokulalela ngaphandle kokuba ngemuva kokulalela kwakhe kuqashelwe uNkulunkulu ongcwele. Imiphefumulo eminingi iqala ukuza kuNkulunkulu lapho ilahla ukuba nenkolo, ngoba munye kuphela uMphathi wenhliziyo yomuntu, futhi lowo akuyona inkolo kodwa nguJesu Kristu. Kodwa maye kimi uma lapho ngibona Yena ngithi — ngeke. Yena akasoze aphikelela ukuba ngikwenze, kodwa sengiqalile ukusayina isigwebo sentambo seNdodana kaNkulunkulu emphefumulweni wami. Lapho ngima ubuso nobuso noJesu Kristu futhi ngithi — ngeke, Yena akasoze aphikelela; kodwa ngihlehla emandleni okudala kabusha okuhlengwa kwaKhe. Kumusa kaNkulunkulu akunandaba ukuthi nginengeka kangakanani uma ngiza ekukhanyeni; kodwa maye kimi uma ngenqaba ukukhanya (bheka NgokukaJohane 3:19-21).