ONGCWELE KAMOYA
“Ukuze ngimazi Yena.”
KwabaseFiliphi 3:10
Isinyathelo songcwele asiqondile ekuzazini uqobo, kodwa ekwazini uJesu Kristu. Ongcwele kamoya akalokothi akholelwe ukuthi izimo zivele zenzeke nje, noma ahlukanise ukuphila kwakhe kube okwezwe nokungcwele; ubona zonke izimo aphonswa kuzo njengendlela yokuthola ulwazi ngoJesu Kristu. Kukhona ukuzinikela okungenakuzigodla kuye. UMoya oNgcwele uzimisele ukuba senze uJesu Kristu abe ngokoqobo kuyo yonke imikhakha yokuphila, futhi uzosibuyisela ephuzwini elifanayo kaninginingi size sikwenze. Ukuzenza ube ngokoqobo kuholela ekubekeni umsebenzi esihlalweni sobukhosi; kanti ongcwele ubeka uJesu Kristu esihlalweni sobukhosi emsebenzini wakhe. Kungakhathaliseki ukuthi ukudla noma ukuphuza noma ukugeza izinyawo zabafundi, noma ngabe kuyini, kumelwe sithathe isinyathelo sokwenza uJesu Kristu abe ngokoqobo kukho. Sonke isigaba sokuphila kwethu okungokoqobo sinohlangothi oluhambisana naso ekuphileni kukaJesu. INkosi yethu yayiqaphela ubuhlobo baYo noYise ngisho nasemsebenzini ophansi kunayo yonke. "UJesu azi . . . ukuthi wayevela kuNkulunkulu, futhi eya kuNkulunkulu . . . wathatha ithawula . . . waqala ukugeza izinyawo zabafundi."
Inhloso yongcwele kamoya iwukuthi "ngimazi Yena." Ngiyamazi Yena lapha engikhona namuhla? Uma kungenjalo, ngiyamdumaza. Ngilapha hhayi ukuba ngizazi mina, kodwa ukuba ngazi uJesu. Emsebenzini wobuKristu ukuthatha isinyathelo kuvame kakhulu ukuqala ekuqapheleni ukuthi kukhona okufanele kwenziwe futhi yimi okufanele ngikwenze. Leso akusona neze isimo sengqondo songcwele kamoya, inhloso yakhe ukwenza uJesu Kristu abe ngokoqobo kuzo zonke izimo akuzo.