IVILA LIKAMOYA
“Masicabangelane ukuze sivuselane othandweni nasemisebenzini emihle; singakuyeki ukuhlangana kwethu ndawonye.”
KumaHebheru 10:24-25
Sonke singaba amavila kamoya; asifuni ukungena ekuphithizeleni nasekushayisaneni kokuphila njengoba kunjalo, okuwukuphela kwenjongo yethu ukuzitholela ukuzihlukanisa. Umyalezo ogcizelelwa kumaHebheru 10 ngowokuvusana nokuhlala ndawonye — kokubili lokhu kudinga ukuthatha isinyathelo, isinyathelo sokwenza uKristu abe ngokoqobo ekuphileni, hhayi sokuzenza thina sibe ngokoqobo. Ukuphila kude nabanye, uzikhiphile futhi uzihlukanisile, kuphambene ngokuphelele nengokomoya njengoba uJesu Kristu alifundisa.
Ukuvivinywa kwengokomoya lethu kufika lapho sibhekana nokungabi nabulungisa nobuncane benhliziyo nokungabongi nesiphithiphithi, konke lokhu kuthambekele ekusenzeni amavila kamoya. Sifuna ukusebenzisa umthandazo nokufunda iBhayibheli ngenjongo yokuzihlukanisa. Sisebenzisa uNkulunkulu ukuze sithole ukuthula nenjabulo, okungukuthi, asifuni ukwenza uJesu Kristu abe ngokoqobo ekuphileni, sifuna kuphela ukuzijabulisa kwethu kuYe. Lesi yisinyathelo sokuqala esiya ohlangothini olungalungile. Zonke lezi zinto ziyimiphumela futhi sizama ukuzenza izimbangela.
"Ngibona kufanelekile," kusho uPetru, ". . . ukuba nginivuse ngokunikhumbuza." Kuyinto ephazamisa kakhulu ukushaywa ezimbanjeni ngumvusi othunywe nguNkulunkulu, ngumuntu ogcwele ukusebenza kukamoya. Umsebenzi omatasatasa nokusebenza kukamoya akuyona into efanayo. Umsebenzi omatasatasa ungaba mbumbulu wokusebenza kukamoya. Ingozi yobuvila bukamoya iwukuthi asifuni ukuvuswa, konke esifuna ukukuzwa kungokuzihlukanisa kukamoya. UJesu Kristu akawukhuthazi neze umqondo wokuzihlukanisa — "Hamba utshele abafowethu . . ."