UKUKHULULEKA PHEZU KOKWALASHA LEVANGELI
“Ngakho yimani niqinile ekukhululekeni uKristu asikhulule ngakho.”
KwabaseGalathiya 5:1
Umuntu ogxile ezintweni zomoya akasoze eza kuwe nemfuneko ethi — "Kholwa yilokhu nalokhuya;" kodwa uyofuna ukuba uqondanise ukuphila kwakho nezindinganiso zikaJesu. Asicelwa ukuba sikholwe iBhayibheli, kodwa ukuba sikholwe Lowo iBhayibheli elimembulayo (qh. NgokukaJohane 5:39-40). Sibizelwe ukwethula ukukhululeka kukanembeza, hhayi ukukhululeka kwemibono. Uma sikhululekile ngokukhululeka kukaKristu, abanye bayolethwa kulokho kukhululeka okufanayo — ukukhululeka kokuqaphela ukubusa kukaJesu Kristu.
Hlala njalo ulinganisa ukuphila kwakho ngezindinganiso zikaJesu. Thobisa intamo yakho ejokeni laKhe kuphela, hhayi kunoma yiliphi elinye ijoka; futhi qaphela ukuqinisekisa ukuthi awubophi abanye ngejoka elingabekwanga nguJesu Kristu. Kuthatha isikhathi eside ukuba uNkulunkulu asikhiphe emkhubeni wokucabanga ukuthi ngaphandle kokuba wonke umuntu abone njengathi, unephutha. Lowo akuwona nanini umbono kaNkulunkulu. Kunokukhululeka okukodwa kuphela, ukukhululeka kukaJesu okusebenza kunembeza wethu kusinika amandla okwenza okulungile.
Ungaphelelwa isineke, khumbula indlela uNkulunkulu akuphatha ngayo — ngokubekezela nangobumnene; kodwa ungalokothi unciphise amandla eqiniso likaNkulunkulu. Livumele lisebenze ngendlela yalo futhi ungalokothi uxolise ngalo. UJesu wathi, "Hambani nenze abafundi," hhayi ukuthi "nenze abantu abaphendukela emibonweni yenu."