UMBONO
“Angizange ngingawulaleli umbono wasezulwini.”
IZenzo 26:19
Uma silahlekelwa umbono, yithina sodwa abanecala, futhi indlela esilahlekelwa ngayo umbono iwukuvuza ngokomoya. Uma singakusebenzisi ezindabeni ezingokoqobo lokho esikukholelwayo ngoNkulunkulu, umbono uNkulunkulu asinike wona usuphelile. Okuwukuphela kwendlela yokulalela umbono wasezulwini ukunikela konke okusemandleni ethu kulokho okuphakeme kakhulu kwaKhe, futhi lokhu kungenziwa kuphela ngokukhumbula umbono ngokuqhubekayo nangokuzimisela. Isivivinyo yimizuzwana engamashumi ayisithupha yawo wonke umzuzu, nemizuzu engamashumi ayisithupha yawo wonke amahora, hhayi izikhathi zethu zokuthandaza nemihlangano yokuzinikela.
"Nakuba ubambezeleka, uwulinde." Asikwazi ukufinyelela embonweni, kufanele siphile ngogqozi lwawo kuze kube yilapho wona uzigcwalisa. Siba ngabantu abenza izinto kuphela kangangokuba sikhohlwa umbono. Ekuqaleni sawubona kodwa asiwulindanga; sagijimela emsebenzini ongokoqobo, kwathi lapho umbono ugcwaliseka, asiwubonanga. Ukulinda umbono obambezelekayo kuyisivivinyo sokwethembeka kwethu kuNkulunkulu. Inhlalakahle yomphefumulo wethu iba sengozini lapho sibambeka emsebenzini ongokoqobo bese siphuthelwa ukugcwaliseka kombono.
Qaphela izivunguvungu zikaNkulunkulu. Okuwukuphela kwendlela uNkulunkulu ahlwanyela ngayo abangcwele baKhe kungesivunguvungu saKhe. Ingabe uyophenduka ikhoba elingenalutho? Lokho kuyoya ngokuthi empeleni uyaphila yini ekukhanyeni kwalokho okubonile. Vumela uNkulunkulu akujikijele ngaphandle, futhi ungahambi aze akwenze. Uma uzikhethela indawo, uyophenduka ikhoba elingenalutho. Uma uNkulunkulu ekuhlwanyela, uyothela izithelo.
Kubalulekile ukujwayela ukuhamba ngezinyawo ekukhanyeni kombono.