NY MAHA-IZY AZY MANOKANA

Ny maha-izy azy manokana no akoran’ny fiainan’ny maha-olona. Feno kiho ny maha-izy azy manokana, mampisaraka sy mampitoka-monina izany. Toetran’ny zaza izany ary ara-drariny ny maha-toy izany azy; nefa raha afangarontsika amin’ny fiainan’ny maha-olona ny maha-izy azy manokana, dia hitoka-monina hatrany isika. Ny akoran’ny maha-izy azy manokana no rakotra voajanahary noforonin’Andriamanitra hiarovana ny fiainan’ny maha-olona; nefa tsy maintsy miala ny maha-izy azy manokana mba hahafahan’ny fiainan’ny maha-olona mivoaka sy ampidirina amin’ny fiombonana amin’Andriamanitra. Ny maha-izy azy manokana dia maka tahaka sandoka ny maha-olona tahaka ny filan’ny nofo maka tahaka sandoka ny fitiavana. Nataon’Andriamanitra ho Azy ny toetra voajanaharin’ny olombelona; ampanambanian’ny maha-izy azy manokana ho an’ny tenany ny toetra voajanaharin’ny olombelona.

Ny fahaleovantena sy ny fanamafisan-tena no toetran’ny maha-izy azy manokana. Ny fanamafisana tsy an-kijanona ny maha-izy azy manokana no manakana ny fiainantsika ara-panahy mihoatra noho ny zavatra hafa rehetra. Raha manao hoe — "Tsy afaka mino aho," dia satria misakana ny lalana ny maha-izy azy manokana; tsy afaka mino na oviana na oviana ny maha-izy azy manokana. Tsy afa-miala amin’ny finoana ny maha-olona. Diniho ny tenanao rehefa miasa ny Fanahin’Andriamanitra. Entiny ho eny amin’ny sisin’ny maha-izy anao manokana ianao, ka tsy maintsy milaza na hoe — "Tsy hanaiky aho," na manolotra tena, mamaky ny akoran’ny maha-izy azy manokana ary mamela ny fiainan’ny maha-olona hivoaka. Isaky ny mandeha dia zavatra iray ihany no ifantohan’ny Fanahy Masina (ampitahao Matio 5:23-24). Ny maha-izy anao manokana no ilay ao anatinao izay tsy mety hihavana amin’ny rahalahinao. Tian’Andriamanitra hampiraisina Aminy ianao, nefa tsy azony atao izany raha tsy vonona hamoy ny zonao amin’ny tenanao ianao. "Aoka izy handà ny tenany" — mandà ny zony mahaleo tena amin’ny tenany, dia hanana fahafahana hitombo ny tena fiainana.