NY MAHA-TANTERAKA TSY MISY FEPETRA AN’I JESOSY KRISTY
“Hanome voninahitra Ahy Izy.”
Jaona 16:14
Tsy manana na inona na inona amin’ny zava-misy henjana ao amin’ny Testamenta Vaovao ireo hetsika pietista ankehitriny; tsy misy na inona na inona ao aminy mitaky ny Fahafatesan’i Jesosy Kristy; ny hany ilaina dia rivo-piainana tia fivavahana, sy vavaka ary fanoloran-tena. Tsy mihoatra ny voajanahary na mahagaga ity karazana fanandramana ity, tsy nitaky ny fijalian’Andriamanitra izany, tsy nolokoina tamin’ny ran’ny Zanak’ondry, ary tsy nasiana ny mariky ny Fanahy Masina; tsy manana ilay marika izay mahatonga ny olona hiteny, eo am-pijerena amim-panajana sy fahatalanjonana — "Asan’Andriamanitra Tsitoha izany." Izany ary tsy misy hafa no resahin’ny Testamenta Vaovao.
Ny karazana fanandramana Kristiana ao amin’ny Testamenta Vaovao dia fanoloran-tena manokana sy mirehitra amin’ny Tenan’i Jesosy Kristy. Ny karazana fanandramana Kristiana hafa rehetra, izay antsoina amin’izany anarana izany, dia tafasaraka amin’ny Tenan’i Jesosy. Tsy misy fahaterahana ara-panahy indray, tsy misy fahaterahana indray ho ao amin’ny Fanjakana izay iainan’i Kristy, fa ny hevitra fotsiny hoe Modelintsika Izy. Ao amin’ny Testamenta Vaovao dia Mpamonjy i Jesosy Kristy ela be alohan’ny maha-Modely Azy. Ankehitriny dia ahilika ho Sary famantarana eo anoloan’ny Fivavahana iray Izy, Ohatra tsotra fotsiny. Izany Izy, nefa mihoatra tsy hita fetra noho izany Izy; Izy no famonjena mihitsy, Izy no Filazantsaran’Andriamanitra.
Hoy Jesosy, "Rehefa tonga Izy Izay Fanahin’ny fahamarinana . . . dia hanome voninahitra Ahy Izy." Rehefa manolo-tena amin’ny fanambarana natao ao amin’ny Testamenta Vaovao aho, dia raisiko avy amin’Andriamanitra ny fanomezana ny Fanahy Masina Izay manomboka manazava amiko ny nataon’i Jesosy ary manatanteraka ato anatiko amin’ny fomba tsapa manokana izay rehetra nataon’i Jesosy Kristy ho ahy teo amin’ny zava-misy ivelany.