NY FANOKANANA NY HERY ARA-PANAHY

Raha misaintsaina lalina ny Hazofijalian’i Kristy aho, dia tsy tonga mpivavaka mifantoka amin’ny tenako, ka liana amin’ny hafotsiako manokana; fa lasa mifantoka amin’ny fomba manjaka amin’izay mahaliana an’i Jesosy Kristy aho. Tsy olona nitoka-monina na mpampijaly tena ny Tompontsika, tsy nanapaka ny fifandraisany tamin’ny fiaraha-monina Izy, nefa tafasaraka tao anatiny mandrakariva. Tsy nitazona ny tenany ho lavitra Izy, fa niaina tao amin’ny tontolo hafa. Niaina tanteraka tao amin’ny tontolo mahazatra Izy ka nantsoin’ireo mpivavaka tamin’ny androny hoe tendan-kanina sy mpisotro divay. Tsy navelan’ny Tompontsika hisy na inona na inona hanembantsembana ny fanokanany ny hery ara-panahy.

Ny fanokanana sandoka dia ny fanapahana zavatra amim-pahatsiarovan-tena miaraka amin’ny hevitra hanangona hery ara-panahy hampiasaina any aoriana, nefa fahadisoana tsy misy fanantenana izany. Nataon’ny Fanahin’Andriamanitra tsy nahafa-po intsony ny fahotan’ny olona maro, nefa tsy misy fahafahana, tsy misy fahafenoana eo amin’ny fiainany. Ny karazana fiainam-pivavahana hitantsika miely ankehitriny^[1] dia hafa tanteraka amin’ny fahamasinana mahery ao amin’ny fiainan’i Jesosy Kristy. "Tsy mangataka Aho mba hampialanao azy amin’izao tontolo izao, fa mba hiarovanao azy amin’ny ratsy." Tokony ho ao amin’izao tontolo izao isika fa tsy avy aminy; tokony ho tafasaraka amin’izao tontolo izao hatrany amin’ny fototry ny tenantsika, fa tsy etỳ ivelany.

Tsy tokony hamela na inona na inona hanembantsembana ny fanokanana ny herintsika ara-panahy isika. Anjarantsika ny fanokanana, anjaran’Andriamanitra ny fanamasinana; ary tsy maintsy tapa-kevitra amim-piniavana isika fa izay mahaliana an’Andriamanitra ihany no hahaliana antsika. Ny fomba hamahana olana mampisafotofoto dia ny manontany hoe — Ity ve no karazana zavatra mahaliana an’i Jesosy Kristy, sa karazana zavatra mahaliana ny fanahy izay mifanohitra tanteraka amin’i Jesosy?