IZAY TOKONY HOLAVINA

Efa "nandà ny zavatra miafina mahamenatra" ve ianao — ireo zavatra izay tsy avelan’ny fahatsapanao ny haja hivoaka ho amin’ny mazava? Afaka manafina azy ireo mora foana ianao. Misy eritreritra momba olona iray ao am-ponao izay tsy tianao hotarihina ho amin’ny mazava ve? Lavio raha vao mipoitra izany; lavio avokoa ny zavatra rehetra mandra-pahatongan’ny tsy hisian’ny zavatra miafina mahamenatra na hafetsena momba anao. Fitsiriritana, fialonana, ady — tsy voatery hipoitra avy amin’ny toe-panahin’ny fahotana manjaka ao anaty ireo zavatra ireo, fa avy amin’ny firafitry ny vatanao izay nampiasaina tamin’izany karazana zavatra izany tamin’ny andro lasa (jereo Romana 6:19 sy 1Petera 4:1-2). Tohizo ny fiambenana tsy tapaka mba tsy hisy zavatra mahamenatra anao hipoitra eo amin’ny fiainanao.

"Tsy mandeha amin’ny hafetsena," izany hoe, mitady fomba hahatonga ny hevitrao handresy. Fandrika lehibe izany. Fantatrao fa amin’ny fomba iray ihany no hamelan’Andriamanitra anao hiasa, koa mitandrema mba tsy hamandrika olona amin’ny fomba hafa mihitsy; hanjo anao ny fahalazoana avy amin’Andriamanitra raha manao izany ianao. Manao zavatra izay ho fandehanana amin’ny hafetsena ho anao ny hafa, nefa mety tsy ho izany amin’izy ireo: nomen’Andriamanitra fomba fijery hafa ianao. Aza manadonto velively ny fahatsapana ny fara herinao ho an’izay avo indrindra ho Azy. Ny fanaovanao zavatra iray dia hidika ho fidiran’ny hafetsena ho amin’ny tanjona hafa noho izay avo indrindra, sy fanadontoana ny antony manosika nomen’Andriamanitra anao. Maro no niverina satria natahotra ny hijery ny zavatra avy amin’ny fomba fijerin’Andriamanitra. Tonga ara-panahy ny fotoan-tsarotra lehibe rehefa tsy maintsy mivoaka lavidavitra kokoa noho ny fanekem-pinoana nekeny ny olona iray.