NY FIPARITAHAN’NY FIAINANA

Mikasika toerana izay tsy fantatry ny loharanony akory ny ony iray, ary hoy Jesosy fa raha nandray tamin’ny fahafenoany isika, na kely toy inona aza ny refy hita maso amin’ny fiainantsika, dia hisy ony hiboiboika avy ao anatintsika ka hitahy hatrany amin’ny faran’ny tany. Tsy anjarantsika ny momba izay miboiboika — "Izao no asan’Andriamanitra dia ny hinoanareo. . . ." Mahalana Andriamanitra no mamela fanahy iray hahita ny halehiben’ny fitahiana entiny.

Miziriziry amim-pandresena ny ony iray, ka mandresy ny sakana rehetra. Mandritra ny fotoana iray dia mandeha tsy miova amin’ny lalany izy, avy eo mifanehitra amin’ny sakana ka voasakana vetivety, nefa tsy ela dia mamorona lalana manodidina ilay sakana. Na mety hanjavona tsy ho hita mandritra ny maily maro ny ony iray, ary afaka kelikely dia miseho indray ho malalaka sy lehibe kokoa noho ny teo aloha. Hitanao fa mampiasa fiainana sasany Andriamanitra, nefa misy sakana tonga ao amin’ny fiainanao ka toa tsy misy ilàna anao. Tohizo ny fifantohana amin’ny Loharano, dia na hitondra anao manodidina ilay sakana Andriamanitra na hanaisotra izany. Mandresy ny sakana rehetra ny onin’ny Fanahin’Andriamanitra. Aza mampifantoka ny masonao amin’ny sakana na amin’ny fahasarotana velively. Tsy misy lanjany amin’ilay ony izay hiboiboika tsy miova amin’ny alalanao ny sakana raha mahatsiaro mitoetra mahitsy eo amin’ny Loharano ianao. Aza avela hisy zavatra hiditra eo aminao sy i Jesosy Kristy velively, na fihetseham-po, na fanandramana; tsy misy zavatra tokony hanakana anao amin’ilay Loharano lehibe iray feno fiandrianana.

Eritrereto ireo ony manasitrana sy mipaka lavitra izay mikolokolo tena ao amin’ny fanahintsika! Efa nanokatra fahamarinana mahatalanjona ho an’ny saintsika Andriamanitra, ary ny teboka rehetra nosokafany dia famantarana ny hery midadasika kokoa ananan’ilay ony izay hampiboiboihany amin’ny alalantsika. Raha mino an’i Jesosy ianao, dia ho hitanao fa nikolokolo riaka mahery mitondra fitahiana ho an’ny hafa ao anatinao Andriamanitra.