NY FIAMBENAN’NY MISIONERA

"Miaraha miambina Amiko" — tsy misy fomba fijerinao manokana mihitsy, fa miaraha miambina Amiko tanteraka. Amin’ny dingana voalohany dia tsy miara-miambina amin’i Jesosy isika, fa miambina ho Azy. Tsy miara-miambina Aminy amin’ny alalan’ny fanambaran’ny Baiboly isika; ao anatin’ny toe-javatra eo amin’ny fiainantsika. Miezaka mampiditra antsika ao amin’ny firaisana Aminy ao amin’ny Getsemane iray manokana ny Tompontsika, nefa tsy handeha isika; hoy isika — "Tsia, Tompo ô, tsy hitako ny hevitr’izao, mangidy izany." Ahoana no ahafahantsika miara-miambina amin’Olona tsy takatry ny saina? Ahoana no hahatakarantsika an’i Jesosy ampy ka hiara-miambina Aminy ao amin’ny Getsemaneny, raha tsy fantatsika akory izay anton’ny fijaliany? Tsy haintsika ny miara-miambina Aminy; ny hevitra momba an’i Jesosy miara-miambina amintsika ihany no mahazatra antsika.

Tia an’i Jesosy Kristy hatramin’ny fetra farany amin’ny fahaizany voajanahary ireo mpianatra, nefa tsy azony izay nokendreny. Natory noho ny alahelony manokana tao amin’ny Sahan’i Getsemane izy ireo, ary tamin’ny faran’ny telo taona nisian’ny fifandraisana akaiky indrindra dia "nandao Azy avokoa izy rehetra ka nandositra."

"Samy feno ny Fanahy Masina izy rehetra" — ireo "izy ireo," ihany nefa nisy zavatra mahatalanjona nitranga teo anelanelany — ny Fahafatesan’ny Tompontsika sy ny Fitsanganany amin’ny maty ary ny Fiakarany; ary notafihin’ny Fanahy Masina ireo mpianatra ka nanjakany. Efa nilaza ny Tompontsika hoe — "Hahazo hery ianareo rehefa tonga aminareo ny Fanahy Masina," ary izany dia nidika fa nianatra niara-miambina Aminy nandritra ny androm-piainany sisa rehetra izy ireo.