RESEN’I KRISTY LAHATRA VE AHO?

Hoy i Jesosy Kristy, raha ny marina, Aza mifaly amin’ny fanompoana mahomby, fa mifalia satria mifandray Amiko araka ny tokony ho izy ianao. Ny fandrika eo amin’ny asa Kristiana dia ny mifaly amin’ny fanompoana mahomby, dia mifaly amin’ny zava-misy fa nampiasa anao Andriamanitra. Tsy ho vitanao velively ny handrefy izay hataon’Andriamanitra amin’ny alalanao raha mifandray araka ny tokony ho izy amin’i Jesosy Kristy ianao. Tazomy ho mahitsy ny fifandraisanao Aminy, dia na inona na inona toe-javatra misy anao, ary na iza na iza mihaona aminao isan’andro, dia mandrotsaka onin’ny rano velona amin’ny alalanao Izy, ary noho ny famindram-pony no tsy amelany anao hahalala izany. Rehefa mifandray araka ny tokony ho izy amin’Andriamanitra amin’ny alalan’ny famonjena sy ny fanamasinana ianao, dia tsarovy fa na aiza na aiza misy anao, dia Andriamanitra no nametraka anao teo; ary amin’ny alalan’ny fiantraikan’ny fiainanao amin’ireo toe-javatra manodidina anao, dia hanatanteraka ny fikasan’Andriamanitra ianao, raha mbola mitoetra ao amin’ny mazava tahaka ny maha-ao amin’ny mazava an’Andriamanitra.

Ny fironana ankehitriny dia ny hanasongadina ny fanompoana. Mitandrema amin’ireo olona izay manao ny maha-mahasoa ho fototry ny fandresen-dahany. Raha ataonao fitsapana ny maha-mahasoa, dia i Jesosy Kristy no tsy nahomby indrindra tamin’izay rehetra niaina. Andriamanitra mihitsy no kintana fitari-dalan’ny olo-masina, fa tsy ny maha-mahasoa tombanana. Ny asa ataon’Andriamanitra amin’ny alalantsika no manan-danja, fa tsy izay ataontsika ho Azy. Ny hany raharahahin’ny Tompontsika eo amin’ny fiainan’ny olona iray dia ny fifandraisana mendrika amin’ny Rainy. Mitondra zanaka maro ho amin’ny voninahitra i Jesosy.