VAVAKA AO AMIN’NY FANDRENESAN’NY RAY
“Ray ô, misaotra Anao Aho fa efa nandre Ahy Ianao.”
Jaona 11:41
Rehefa mivavaka ny Zanak’Andriamanitra, dia fahatsapana iray ihany no ananany, ary ny Rainy no ao amin’izany fahatsapana izany. Mandre mandrakariva ny vavaky ny Zanany Andriamanitra, ary raha miforona ato anatiko ny Zanak’Andriamanitra dia handre mandrakariva ny vavako ny Ray. Tsy maintsy ataoko azo antoka fa miseho ao amin’ny nofoko mety maty ny Zanak’Andriamanitra. "Tempolin’ny Fanahy Masina ny tenanareo," izany hoe, Betleheman’ny Zanak’Andriamanitra. Mahazo ny fotoanany ato anatiko ve ny Zanak’Andriamanitra? Tanterahina ato anatiko araka ny nanatanterahana azy marina teo amin’ny fiainany ara-tantara ve ny fahatsorana mivantana eo amin’ny fiainan’ny Zanak’Andriamanitra? Rehefa mifandray amin’ireo zava-mitranga eo amin’ny fiainana amin’ny maha-olombelona tsotra ahy aho, mivavaka ato anatiko amin’ny Rainy ve ny vavaky ny Zanak’Andriamanitra Mandrakizay? "Amin’izany andro izany dia hangataka amin’ny anarako ianareo. . . ." Andro inona? Ny andro nahatongavan’ny Fanahy Masina tamiko sy nampiray ahy tamin’ny Tompoko tamin’ny fomba tena mahatanteraka vokatra.
Mahazo fahafaham-po be dia be eo amin’ny fiainanao ve i Jesosy Kristy Tompo sa miseho ho ambony ara-panahy ianao? Aza avela hiditra tsy nasaina mihitsy ny saina mahazatra ka hanosika ny Zanak’Andriamanitra ho eny an-kilany. Fanomezana izay nomen’Andriamanitra ny toetra voajanaharin’ny olombelona ny saina mahazatra; nefa tsy fanomezan’ny Zanany ny saina mahazatra. Fanomezan’ny Zanany ny saina mihoatra ny voajanahary; aza mametraka ny saina mahazatra eo amin’ny seza fiandrianana velively. Mamantatra ny Ray ny Zanaka; tsy mbola namantatra ny Ray ny saina mahazatra ary tsy hamantatra Azy mihitsy. Tsy mitsaoka an’Andriamanitra velively ny faharanitan-tsaintsika tsotra raha tsy ovan’ny Zanak’Andriamanitra mitoetra ao anatiny tarehy amim-boninahitra izany. Tsy maintsy ataontsika azo antoka fa tazonina eo ambanin’ny fanapahany tanteraka ity nofo mety maty ity ary miasa amin’ny alalany isaky ny fotoana Izy. Miaina ao anatin’ny fiankinan’ny olombelona amin’i Jesosy Kristy toy izany ve isika ka miseho isaky ny fotoana ny fiainany?