FANAMASINANA
“Avy Aminy no maha-ao amin’i Kristy Jesosy anareo, Izay nataon’Andriamanitra ho antsika . . . fanamasinana.”
1Korintiana 1:30
Ny lafin’ny fiainana.
Ny zava-miafin’ny fanamasinana dia ny fampitana amiko ny fahatanterahan’i Jesosy Kristy, tsy tsikelikely, fa eo no ho eo rehefa miditra amin’ny finoana ao amin’ny fahatsapana fa natao fanamasinana ho ahy i Jesosy Kristy. Tsy midika zavatra latsaka noho ny fahamasinan’i Jesosy atao fananako miharihary ny fanamasinana.
Ny hany zava-miafina mahatalanjona amin’ny fiainana masina dia tsy ny fakana tahaka an’i Jesosy, fa ny famelana ny fahatanterahan’i Jesosy hiseho ao amin’ny nofoko mety maty. Ny fanamasinana dia "Kristy ao anatinareo." Ny fiainany mahatalanjona no ampitaina amiko ao amin’ny fanamasinana, ary ampitaina amin’ny finoana ho fanomezana feno fiandrianana avy amin’ny fahasoavan’Andriamanitra izany. Manaiky ve aho mba hataon’Andriamanitra ho tena zava-misy ato anatiko tahaka ny maha-tena zava-misy azy ao amin’ny teniny ny fanamasinana?
Ny fanamasinana dia midika ho fampitana ireo toetra Masin’i Jesosy Kristy. Ny faharetany, ny fitiavany, ny fahamasinany, ny finoany, ny fahadiovany, ny toe-panahiny araka an’Andriamanitra, no miseho ao amin’ny fanahy nohamasinina rehetra sy amin’ny alalany. Tsy fisintonana avy amin’i Jesosy ny hery hahamasina ny fanamasinana; fa fisintonana avy amin’i Jesosy ny fahamasinana izay niseho tao Aminy izany, ary asehony ato anatiko izany. Fampitana ny fanamasinana, fa tsy fakana tahaka. Mandeha amin’ny zotra hafa ny fakana tahaka. Ao amin’i Jesosy Kristy no misy ny fahatanterahan’ny zavatra rehetra, ary izao no zava-miafin’ny fanamasinana fa eo am-pelatanako ny fahatanterahan’i Jesosy rehetra, ka miadana nefa azo antoka aho no manomboka miaina fiainana mirindra sy salama saina ary masina tsy hay lazaina: "Voaaro amin’ny herin’Andriamanitra."