TONGA ANY
“Mpampianatra ô, aiza no itoeranao? . . . Avia ka jereo." "Andao hiaraka amiko.”
Jaona 1:39
"Nitoetra niaraka Taminy tamin’izany andro izany izy ireo." Saika izany ihany no ataon’ny sasany amintsika, avy eo mifoha hahita ny zava-misy marina isika, mipoitra ny tombontsoan’ny tena ka tapitra ny fitoerana. Tsy misy toe-javatra eo amin’ny fiainana izay tsy ahafahantsika mitoetra ao amin’i Jesosy.
"Ianao no Simona, ianao no hatao hoe Kefasy." Any amin’ireo toerana eo amin’ny fiainantsika izay efa namafan’Andriamanitra ny fireharehana sy ny fiheverana fa ampy tena ary ny tombontsoan’ny tena ihany no anoratany ilay anarana vaovao. Ny sasany amintsika dia tsy manana ilay anarana vaovao afa-tsy amin’ny toerana vitsivitsy, tahaka ny kitrotro ara-panahy. Amin’ny faritra sasany dia toa tsy misy olana amintsika. Rehefa mitafy ny toe-pontsika ara-panahy tsara indrindra isika, dia hoheverinao ho olo-masina mendri-kaja tokoa izahay; kanefa aza mijery anay rehefa tsy ao amin’izany toe-po izany izahay. Ny mpianatra dia olona izay voasoratra manerana azy ilay anarana vaovao; efa voafafa tanteraka ny tombontsoan’ny tena sy ny fireharehana ary ny fiheverana fa ampy tena.
Ny fireharehana dia fanandratana ny tena ho andriamanitra, ary amin’izao andro izao ao amin’ny sasany amintsika dia tsy araka ny fomban’ny Fariseo izany, fa araka ny an’ny mpamory hetra. Ny filazana hoe "Indrisy, tsy olo-masina aho," dia ankasitrahan’ny fireharehan’olombelona, kanefa fitenenan-dratsy an’Andriamanitra tsy tsapan’ny saina izany. Ny heviny ara-bakiteny dia ny fihantsianao an’Andriamanitra mba hanao anao ho olo-masina, "Malemy sy tsy misy fanantenana loatra aho, any ivelan’ny faritra tratran’ny asa fampihavanana aho." Mety ho fitenenan-dratsy an’Andriamanitra tsy tsapan’ny saina ny fanetren-tena eo anatrehan’ny olona. Nahoana ianao no tsy olo-masina? Na tsy te ho olo-masina ianao, na tsy mino fa afaka manao anao ho olo-masina Andriamanitra. Hilamina ny zava-drehetra, hoy ianao, raha namonjy anao Andriamanitra ka nitondra anao nivantana any an-danitra. Izany indrindra no hataony! "Hankao aminy isika, ka honina ao aminy." Aza mametraka fepetra, avelao i Jesosy ho zava-drehetra, dia hoentiny mody miaraka Aminy ianao tsy mandritra ny andro iray ihany, fa mandrakizay.