NY ZAVA-MIAFIN’NY TOMPO
“Ny zava-miafina (fisakaizana R.V.) an’ny Tompo dia amin’izay matahotra Azy.”
Salamo 25:14
Inona no famantarana ny namana iray? Ny filazany aminao ny alahelony miafina ve? Tsia, fa ny filazany aminao ny fifaliany miafina. Maro no hamboraka aminao ny alahelony miafina, kanefa ny famantarana farany momba ny fifandraisana akaiky dia ny famborahana fifaliana miafina. Efa navelantsika hilaza amintsika ny fifaliany ve Andriamanitra, sa milaza tsy an-kijanona amin’Andriamanitra ny zava-miafintsika isika ka tsy mamela toerana hitenenany amintsika? Amin’ny fiandohan’ny fiainantsika kristianina dia feno fangatahana amin’Andriamanitra isika, avy eo dia hitantsika fa te hampiditra antsika ao amin’ny fifandraisana Aminy Andriamanitra, mba hampifandray antsika amin’ny fikasany. Mifikitra mafy amin’ny hevitr’i Jesosy Kristy momba ny vavaka ve isika — "Hatao anie ny sitraponao" — ka mahazo ny zava-miafin’Andriamanitra? Tsy ireo fitahiany lehibe dia lehibe no tena mahatonga an’Andriamanitra ho malala amintsika fa ireo zavatra bitika, satria asehon’ireny ny fifandraisany akaiky mahatalanjona amintsika; fantany ny antsipiriany rehetra amin’ny fiainantsika tsirairay.
". . . izy no hampianariny ny lalana izay hofidiny." Amin’ny voalohany dia irintsika ny hahatsapa fa tarihin’Andriamanitra isika, avy eo rehefa mandroso isika dia miaina tanteraka ao amin’ny fahatsapana an’Andriamanitra ka tsy mila manontany izay sitrapony, satria tsy ho tonga ao an-tsaintsika mihitsy ny fieritreretana hifidy sitrapo hafa. Raha voavonjy sy nohamasinina isika dia mitarika antsika amin’ny alalan’ny safidintsika mahazatra Andriamanitra, ary raha hifidy izay tsy iriny isika, dia hosakanany, ka tsy maintsy mitandrina sy mankatò isika. Isaky ny misy fisalasalana, dia Mijanòna avy hatrany. Aza manandrana manazava izany mihitsy ka milaza hoe — "Manontany tena aho hoe nahoana aho no tsy tokony hanao izany?" Mampianatra antsika eo amin’izay fidintsika Andriamanitra, izany hoe, mitarika ny saintsika mahazatra Izy, ary tsy manakana ny Fanahiny intsony isika amin’ny filazana tsy tapaka hoe — "Ankehitriny, ry Tompo ô, inona no sitraponao?"