FIFANDRAISANA TSY VOAHELINGELINA

"Amin’izany andro izany dia hangataka amin’ny anarako ianareo," izany hoe, ao amin’ny toetrako voajanahary. Tsy hoe — "Hampiasa ny anarako ho teny majika ianareo," fa hoe — "Hanana fifandraisana akaiky amiko indrindra ianareo ka ho iray amiko." Ny "izany andro izany" dia tsy andro any aoriana, fa andro natao ho an’izao fotoana izao. "Ny Ray mihitsy no tia anareo" — tanteraka sy feno tanteraka ny firaisana. Tsy milaza ny Tompontsika fa tsy hisy fahasahiranana ivelany ny fiainana, fa tahaka ny nahafantarany ny fo sy ny sain’ny Ray dia azony asandratra ho any amin’ny fitoerana any an-danitra isika amin’ny alalan’ny batisa amin’ny Fanahy Masina, ka any no ahafahany maneho amintsika ny torohevitr’Andriamanitra.

"Na inona na inona hangatahinareo amin’ny Ray amin’ny anarako. . . ." Ny "izany andro izany" dia andron’ny fifandraisana tsy voahelingelina eo amin’Andriamanitra sy ny olo-masina. Tahaka ny nijoroan’i Jesosy tsy voaloto teo anatrehan’ny Rainy, dia afaka asandratra ho ao amin’izany fifandraisana izany isika noho ny hery mahavokatra lehibe avy amin’ny batisa amin’ny Fanahy Masina, ka izany — "mba ho iray izy ireo, tahaka ny maha Iray Antsika."

"Homeny anareo izany." Milaza i Jesosy fa heken’Andriamanitra ny vavaka ataontsika. Fanamby lehibe manao ahoana izany! Noho ny herin’ny Fitsanganan’i Jesosy tamin’ny maty sy ny Fiakarany, noho ny Fanahy Masina nirahina hidina, dia azo asandratra ho amin’ny fifandraisana amin’ny Ray isika ka hiray amin’ny sitrapon’Andriamanitra manjaka sy tanteraka amin’ny alalan’ny safidintsika malalaka tahaka an’i Jesosy. Eo amin’izany toerana mahatalanjona, izay nametrahan’i Jesosy Kristy antsika, dia afaka mivavaka amin’Andriamanitra amin’ny anarany isika, ao amin’ny toetrany voajanahary, izay nomena antsika tamin’ny alalan’ny Fanahy Masina, ary hoy i Jesosy — "Na inona na inona hangatahinareo amin’ny Ray amin’ny anarako, dia homeny anareo." — Zahan-toetra amin’ny fanambarany manokana ny toetra manjakan’i Jesosy Kristy.