TSY FAHAZOANA RESY AVY AMIN’NY TSINDRIMANDRY
“Ento ny ziogako, ary mianara Amiko.”
Matio 11:29
"Izay tian’ny Tompo, dia faiziny mba hanitsy." Endrey ny maha-madinika ny fitarainantsika! Manomboka mitondra antsika ny Tompontsika ho amin’ny toerana ahafahantsika manana firaisana Aminy, nefa misento isika ka manao hoe — "Tompo ô, avelao aho hitovy amin’ny olon-kafa!" Mangataka antsika hitondra ny tendrony iray amin’ny zioga i Jesosy — "Mora ny ziogako, mankanesa eo anilako dia hiara-misintona isika." Efa tafaray amin’ny Tompo Jesosy tahaka izany ve ianao? Raha izany, dia hisaotra an’Andriamanitra noho ny faneren’ny tanany ianao.
"Izay tsy manan-kery dia ampitomboiny hery." Tonga Andriamanitra ka manaisotra antsika amin’ny fihetseham-pontsika diso tafahoatra, ary ny fitarainantsika dia miova ho hiram-piderana fandresena. Ny hany lalana hahafantarana ny herin’Andriamanitra dia ny mitondra ny ziogan’i Jesosy eo amintsika sy mianatra Aminy.
"Ny fifalian’ny Tompo no herinareo." Avy aiza no ahazoan’ny olona masina ny fifaliany? Raha tsy nahafantatra olona masina sasany isika, dia ho niteny hoe — "Indrisy, izy, na lahy na vavy, tsy manana na inona na inona hoentiny." Asandrato ny efitra lamba. Ny fisian’ny fiadanan’Andriamanitra sy ny fahazavany ary ny fifaliany eo dia porofo fa eo koa ny enta-mavesatra. Ny enta-mavesatra apetrak’Andriamanitra dia mamihina ny voaloboka ka mivoaka ny divay; ny divay ihany no hitan’ny ankamaroantsika. Tsy misy hery eto an-tany na any amin’ny helo afaka mandresy ny Fanahin’Andriamanitra ao amin’ny fanahin’olombelona, fa tsy fahazoana resy ao anaty izany.
Raha misy feo mitaraina ao anatinao, dakao hivoaka tsy misy indrafo izany. Heloka miharihary ny malemy ao amin’ny herin’Andriamanitra.