TSY MISY TSY FIFANKAHAZOANA VE?

Mety tsy hahatakatra izay lazain’i Jesosy Kristy aho, fa mampidi-doza ny milaza fa noho izany dia diso Izy tamin’izay nolazainy. Tsy marina mihitsy ny mieritreritra fa hitondra fahafaham-baraka ho an’i Jesosy ny fankatoavako ny tenin’Andriamanitra iray. Ny tsy fankatoavana Azy ihany no zavatra hitondra fahafaham-baraka. Tsy marina mihitsy ny mametraka ny fomba fijeriko momba ny voninahiny ho solon’izay hita mazava fa anereny ahy hatao, na dia mety avy amin’ny faniriana marina hisakana Azy tsy hatao afa-baraka ampahibemaso aza izany. Fantatro fa avy amin’Andriamanitra ny tolo-kevitra iray noho ny fikirizany tony: Rehefa tsy maintsy mandanja ny lafiny manohana sy manohitra aho, ka miditra ny fisalasalana sy ny adihevitra, dia mampiditra singa iray tsy avy amin’Andriamanitra aho, ary manatsoaka hevitra fa tsy marina ilay soso-kevitra. Maro amintsika no mahatoky amin’ny hevitsika momba an’i Jesosy Kristy, fa firy amintsika no mahatoky Aminy? Ny fahatokiana amin’i Jesosy dia midika fa tsy maintsy mandroso amin’ny toerana tsy ahitako na inona na inona aho (jereo Matio 14:29); ny fahatokiana amin’ny hevitro dia midika fa esoriko aloha amin’ny faharanitan-tsaiko izay misakana. Ny finoana dia tsy fahatakarana vokatry ny faharanitan-tsaina, fa fanolorana amim-piniavana ny tena ho an’Olona iray eo amin’ny toerana tsy ahitako lalana.

Miady hevitra ve ianao na hanao dingana iray amin’ny finoana an’i Jesosy sa hiandry mandra-pahitanao ny fomba hanaovana ilay zavatra samirery? Ankatoavy Izy amin’ny fifaliana feno fahasahiana tsy misy kajikajy. Rehefa milaza zavatra Izy ka manomboka miady hevitra ianao, dia satria manana fiheverana momba ny voninahiny izay tsy voninahiny ianao. Mahatoky amin’i Jesosy ve ianao sa mahatoky amin’ny hevitrao momba Azy? Mahatoky amin’izay lazainy ve ianao, sa miezaka manao marimaritra iraisana amin’ny fiheverana izay tsy avy Aminy mihitsy? "Na inona na inona lazainy aminareo, dia ataovy."