FAHALIANA SA FIRAISANA?
“Voahombo tamin’ny hazo fijaliana miaraka amin’i Kristy aho.”
Galatiana 2:20
Ny filana tsy azo ihodivirana ara-panahy dia ny manao sonia ny didy famonoana ny toe-panahin’ny fahotana manjaka ao anaty, ka mamadika ny fahatsapana ara-pihetseham-po sy ny finoan-kevitra ara-tsaina rehetra ho didim-pitondran-tena manohitra ny toe-panahin’ny fahotana manjaka ao anaty, izany hoe, ny fitakiako ny zoko amin’ny tenako. Hoy Paoly — "Voahombo tamin’ny hazo fijaliana miaraka amin’i Kristy aho"; tsy milaza izy — "Nanapa-kevitra hanahaka an’i Jesosy Kristy aho," na, "Hiezaka hanaraka Azy aho" — fa — "Efa nampiraisina Taminy tao amin’ny fahafatesany aho." Rehefa tonga amin’izany fanapahan-kevitra ara-pitondran-tena izany aho ka manatanteraka azy, dia tanterahina ato anatiko izay rehetra nataon’i Kristy ho ahy teo amin’ny Hazofijaliana. Ny fanolorako an-tsitrapo ny tenako ho an’Andriamanitra dia manome fahafahana ny Fanahy Masina hizara amiko ny fahamasinan’i Jesosy Kristy.
". . . kanefa velona aho. . . ." Mitoetra ny maha-izy azy manokana, fa ny loharano manosika, dia ny toe-panahy manjaka ao anaty, no miova tanteraka. Mitoetra ihany ilay vatan’olombelona, fa rava ny zo satànika taloha amin’ny tenako.
"Ary ny fiainana izay iainako ankehitriny ao amin’ny nofo . . . ," dia tsy ilay fiainana iriko sy angatahiko amin’ny vavaka mba hiainana, fa ilay fiainana iainako ankehitriny ao amin’ny nofoko mety maty, dia ilay fiainana hitan’ny olona, "iainako amin’ny finoana ananan’ny Zanak’Andriamanitra." Tsy ny finoan’i Paoly an’i Jesosy Kristy izany finoana izany, fa ny finoana izay nozarain’ny Zanak’Andriamanitra taminy — "ny finoana ananan’ny Zanak’Andriamanitra." Tsy finoana ny finoana intsony izany, fa finoana nitsambikina nihoatra ny fetra rehetra tsapan’ny saina, dia ilay finoan’ny Zanak’Andriamanitra indrindra.