NY FOTOAM-PITSARANA LEHIBE ATAON’NY TOMPO
“Fa isika rehetra dia tsy maintsy hiseho eo anoloan’ny seza fitsaran’i Kristy.”
2Korintiana 5:10
Milaza i Paoly fa isika rehetra, na mpitory na vahoaka, dia tsy maintsy "hiseho eo anoloan’ny seza fitsaran’i Kristy." Raha mianatra miaina ao amin’ny fahazavana fotsin’i Kristy eto sy ankehitriny ianao, dia hampifaly anao amin’ny farany ny fitsarana noho ny asan’Andriamanitra ao aminao. Tazòny tsy tapaka hifanatrika amin’ny seza fitsaran’i Kristy ny tenanao; mandehana izao ao amin’ny fahazavan’izay masina indrindra fantatrao. Hiafara amin’ny fanahin’ny devoly ny toe-tsaina diso momba ny fanahy hafa, na masina toy inona aza ianao. Fitsarana iray araka ny nofo, dia helo ato anatinao no hiafarany. Tariho avy hatrany ho ao amin’ny mazava izany ary lazao — "Andriamanitro ô, meloka teo aho." Raha tsy manao izany ianao, dia hameno ny tenanao manontolo ny hamafisana. Ny sazin’ny fahotana dia ny fiorenana mafy ao amin’ny fahotana. Tsy Andriamanitra irery no manasazy noho ny fahotana; mampiorina ny tenany ao amin’ny mpanota ny fahotana ary mamerina ny tambiny manontolo. Tsy misy tolona na vavaka hahafahanao mijanona tsy hanao zavatra sasany, ary ny sazin’ny fahotana dia ny hahatonga anao ho zatra tsikelikely amin’izany ka tsy hahafantaranao fa fahotana izany. Tsy misy hery afa-tsy ny fidiran’ny Fanahy Masina afaka manova ny vokatra raiki-tampisaka ateraky ny fahotana.
"Fa raha mandeha ao amin’ny mazava isika tahaka ny maha-ao amin’ny mazava Azy." Ny fandehanana ao amin’ny mazava ho an’ny maro amintsika dia midika fandehanana araka ny fenitra apetratsika ho an’ny olon-kafa. Ny Fariseisma mahafaty indrindra ankehitriny dia tsy fihatsarambelatsihy, fa ny tsy maha-tena izy izay tsy tsapan’ny saina.