MINO VE IANAREO IZAO?

Mino izahay izao. Hoy Jesosy — Tena mino ve ianareo? Ho avy ny fotoana izay hamelanareo Ahy irery. Maro ny mpiasa Kristiana nandao an’i Jesosy Kristy irery ka nandeha niasa noho ny fahatsapana adidy, na noho ny fahatsapana filana avy amin’ny fahaiza-manavaka manokana ananany. Ny tsy fisian’ny fiainam-pitsanganan’i Jesosy tamin’ny maty no anton’izany. Niala tamin’ny fifandraisana akaiky amin’Andriamanitra ny fanahy tamin’ny fiankinana tamin’ny fahatakarany ara-pivavahana manokana. Tsy misy fahotana amin’izany, ary tsy misy sazy mifamatotra aminy; fa rehefa tsapan’ny fanahy ny fomba nanakanany ny fahatakarany an’i Jesosy Kristy, sy namoronany fahaverezan-kevitra sy alahelo ary fahasahiranana ho an’ny tenany, dia tsy maintsy miverina amin-kenatra sy amin’ny fo torotoro sy manenina izy.

Mila miankina lalina lavitra noho izao amin’ny fiainam-pitsanganan’i Jesosy amin’ny maty isika, mba hahazatra antsika hamerina tsy tapaka ny zavatra rehetra Aminy; fa tsy izany no ataontsika fa mandray fanapahan-kevitra araka ny saina mahazatra isika ary mangataka an’Andriamanitra hitahy azy. Tsy afaka manao izany Izy, tsy ao amin’ny faritra anjakany izany, tafasaraka amin’ny zava-misy izany. Raha manao zavatra noho ny fahatsapana adidy isika, dia mametraka fenitra hifaninana amin’i Jesosy Kristy. Manjary "olona ambony," isika ka milaza — "Amin’ity raharaha ity izao dia tsy maintsy manao izao sy izao aho." Napetratsika eo amin’ny seza fiandrianana ny fahatsapantsika adidy fa tsy ny fiainam-pitsanganan’i Jesosy tamin’ny maty. Tsy asaina mandeha ao amin’ny fahazavan’ny fieritreretana na ny fahatsapana adidy isika, fa mandeha ao amin’ny mazava araka ny maha-ao amin’ny mazava an’Andriamanitra. Rehefa manao zavatra noho ny fahatsapana adidy isika, dia afaka manohana izany amin’ny adihevitra; rehefa manao zavatra ho fankatoavana ny Tompo isika, dia tsy misy adihevitra azo atao; izany no antony ahafahana maneso mora foana ny olo-masina.