NY OLANA SAROTRA AMIN’NY FANKATOAVANA
“Ary natahotra ny hilaza ny fahitana tamin’i Ely i Samoela.”
1Samoela 3:15
Tsy miteny amintsika amin’ny fomba manaitra tampoka mihitsy Andriamanitra, fa amin’ny fomba mora takarina vilana, ary hoy isika, "Sao dia feon’Andriamanitra izany?" Nilaza i Isaia fa niteny taminy "tamin’ny tanana mahery," ny Tompo, izany hoe tamin’ny alalan’ny faneren’ny toe-javatra. Tsy misy zavatra mikasika ny fiainantsika afa-tsy Andriamanitra mihitsy no miteny amin’izany. Mahafantatra ny tanany ve isika sa fisehoan-javatra tsotra fotsiny?
Ataovy fahazarana ny milaza hoe, "Mitenena, Tompo ô," dia hanjary tantara mahavariana ny fiainana. Isaky ny maneritery ny toe-javatra, dia lazao hoe, "Mitenena, Tompo ô"; makà fotoana hihainoana. Mihoatra noho ny fitaovana fampiofanana ny famaizana fanitsiana, natao hitondra ahy eo amin’ny toerana ilazako hoe, "Mitenena, Tompo ô." Tsarovy ilay fotoana nitenenan’Andriamanitra taminao. Hadinonao ve izay nolazainy? Lioka 11:13 ve izany, sa 1Tesaloniana 5:23? Rehefa mihaino isika, dia mihamaranitra ny sofintsika, ary, tahaka an’i Jesosy, dia handre an’Andriamanitra mandrakariva isika.
Holazaiko amin’ilay olona antsoiko hoe "Ely" ve izay nasehon’Andriamanitra tamiko? Eo no idiran’ny olana sarotra amin’ny fankatoavana. Tsy mankatò an’Andriamanitra isika rehefa manao ny tenantsika ho fitondran’Andriamanitra tsy matihanina — Tsy maintsy miaro an’i "Ely," ilay olona tsara indrindra fantatsika aho. Tsy nilaza tamin’i Samoela Andriamanitra mba hilaza amin’i Ely; tsy maintsy nanapa-kevitra samirery izy. Ny antson’Andriamanitra aminao dia mety handratra an’ilay antsoinao hoe "Ely;" fa raha miezaka misakana ny fijaliana eo amin’ny fiainan’ny hafa ianao, dia ho tonga sakana eo amin’ny fanahinao sy Andriamanitra izany. Ny tenanao ihany no tandindomin-doza raha sakananao ny fanapahana ny tanana ankavanana na ny fanongotana ny maso.
Aza mangataka torohevitra amin’olon-kafa mihitsy momba izay rehetra asain’Andriamanitra anapahanao hevitra eo anatrehany. Raha mangataka torohevitra ianao, dia saika hiandany amin’i Satana mandrakariva. "Tsy naka hevitra tamin’ny nofo aman-dra avy hatrany aho."