DESERTEUR OF DISSIPEL?

Wanneer God deur Sy Gees deur Sy woord ’n visie gee van wat Hy wil hê, en u denke en siel daardeur verruk word, indien u nie in die lig van daardie visie wandel nie, sal u wegsink in diensbaarheid aan ’n standpunt wat Ons Here nooit gehad het nie. Ongehoorsaamheid in die denke aan die hemelse visie sal u ’n slaaf maak van standpunte wat vreemd aan Jesus Christus is. Moenie na iemand anders kyk en sê — Wel, indien hy daardie sienings kan hê en voorspoedig wees, waarom kan ek nie? U moet in die lig van die visie wandel wat aan u gegee is en uself nie met ander vergelyk of hulle oordeel nie, dit is tussen hulle en God. Wanneer u ontdek dat ’n standpunt waarin u u verheug het met die hemelse visie bots en u debatteer, sal bepaalde dinge in u begin ontwikkel — ’n sin vir eiendom en ’n sin vir persoonlike reg, dinge waarvan Jesus Christus niks gemaak het nie. Hy was altyd teen hierdie dinge as die wortel van alles wat aan Homself vreemd is. "’n Mens se lewe bestaan nie uit die oorvloed van sy besittings nie." Indien ons dit nie erken nie, is dit omdat ons die onderstroom van Ons Here se leer ignoreer.

Ons is geneig om agteroor te lê en ons te koester in die herinnering aan die wonderlike ervaring wat ons gehad het. Indien daar een maatstaf in die Nuwe Testament is wat deur die lig van God geopenbaar word en u nie daaraan voldoen nie, en nie geneig voel om daaraan te voldoen nie, is dit die begin van terugval, omdat dit beteken dat u gewete nie op die waarheid antwoord nie. U kan ná die onthulling van ’n waarheid nooit weer dieselfde wees nie. Daardie oomblik merk u om as ’n meer ware dissipel van Jesus Christus voort te gaan of as ’n deserteur terug te gaan.