NIE DEUR MAG OF DEUR KRAG NIE
“En my woord en my prediking was nie met verleidelike woorde van menslike wysheid nie, maar in betoning van die Gees en van krag.”
1 Korintiërs 2:4
Indien u in die prediking van die Evangelie u duidelike kennis van die weg van redding in die plek stel van vertroue in die krag van die Evangelie, verhinder u mense om by Werklikheid uit te kom. U moet toesien dat terwyl u u kennis van die weg van redding verkondig, u self in geloof in God gewortel en gegrond is. Moet nooit op die duidelikheid van u uiteensetting staatmaak nie, maar wanneer u u uiteensetting gee moet u toesien dat u op die Heilige Gees staatmaak. Steun op die sekerheid van God se verlossende krag, en Hy sal Sy eie lewe in siele skep.
Wanneer u eenmaal in Werklikheid gewortel is, kan niks u skud nie. Indien u geloof in ervarings is, sal enigiets wat gebeur daardie geloof waarskynlik versteur; maar niks kan God of die almagtige Werklikheid van Verlossing ooit versteur nie; grond u geloof daarop, en u is so ewig veilig soos God. Wanneer u eenmaal in persoonlike aanraking met Jesus Christus kom, sal u nooit weer beweeg word nie. Dit is die betekenis van heiligmaking. God plaas Sy afkeuring op menslike ervaring wanneer ons begin vashou aan die opvatting dat heiligmaking bloot ’n ervaring is, en vergeet dat heiligmaking self geheilig moet word (sien Johannes 17:19). Ek moet my geheiligde lewe doelbewus aan God vir Sy diens gee, sodat Hy my as Sy hande en Sy voete kan gebruik.