AFLEIDING VAN ANTIPATIE
“Wees ons genadig, o Here, wees ons genadig: want ons is buitengewoon opgestapel met veragting.”
Psalm 123:3
Die ding waarvoor ons moet oppas is nie soseer skade aan ons geloof in God nie as skade aan ons Christelike gemoed. "Gee daarom ag op jou gees, dat julle nie verraderlik handel nie." Die gemoedstemming is geweldig in sy uitwerkings, dit is die vyand wat reg tot in die siel deurdring en die denke van God aflei. Daar is bepaalde gemoedstemminge waaraan ons ons nooit durf oorgee nie; indien ons dit doen, ontdek ons dat hulle ons van geloof in God afgelei het, en totdat ons na die rustige stemming voor God terugkeer, is ons geloof in Hom nul, en is ons vertroue in die vlees en in menslike vindingrykheid die ding wat regeer.
Pas op vir "die sorge van hierdie wêreld," omdat hulle die dinge is wat ’n verkeerde gemoedstemming van die siel voortbring. Dit is buitengewoon watter enorme mag daar in eenvoudige dinge is om ons aandag van God af te lei. Weier om deur die sorge van hierdie lewe oorweldig te word.
Nog ’n ding wat ons aflei is die begeerlikheid tot selfregverdiging. Die heilige Augustinus het gebid — "O Here, verlos my van hierdie begeerlikheid om myself altyd te regverdig." Daardie gemoedstemming vernietig die siel se geloof in God. "Ek moet myself verklaar; ek moet mense laat verstaan." Ons Here het nooit enigiets verklaar nie; Hy het dwalinge gelaat om hulleself reg te stel.
Wanneer ons onderskei dat mense nie geestelik verder gaan nie en die onderskeiding in kritiek laat verander, versper ons ons weg na God. God gee ons nooit onderskeiding sodat ons kan kritiseer nie, maar sodat ons voorbidding kan doen.