DIE VERGIFNIS VAN GOD

Pas op vir die aangename siening van die Vaderskap van God — God is so vriendelik en liefdevol dat Hy ons natuurlik sal vergewe. Daardie sentiment het hoegenaamd geen plek in die Nuwe Testament nie. Die enigste grond waarop God ons kan vergewe is die ontsaglike tragedie van die Kruis van Christus; om vergifnis op enige ander grond te plaas is onbewuste godslastering. Die enigste grond waarop God sonde kan vergewe en ons in Sy guns kan herstel is deur die Kruis van Christus, en op geen ander manier nie. Vergifnis, wat vir ons so maklik is om te aanvaar, het die smart van Golgota gekos. Dit is moontlik om die vergifnis van sonde, die gawe van die Heilige Gees, en ons heiligmaking met die eenvoud van geloof te neem, en te vergeet teen watter enorme koste vir God dit alles ons s’n gemaak is.

Vergifnis is die Goddelike wonder van genade; dit het God die Kruis van Jesus Christus gekos voordat Hy sonde kon vergewe en ’n heilige God kon bly. Moet nooit ’n siening van die Vaderskap van God aanvaar indien dit die Versoening uitwis nie. Die openbaring van God is dat Hy nie kan vergewe nie; Hy sou Sy natuur weerspreek indien Hy dit gedoen het. Die enigste manier waarop ons vergewe kan word is deur die Versoening na God teruggebring te word. God se vergifnis is slegs natuurlik in die bonatuurlike domein.

Vergeleke met die wonder van die vergifnis van sonde, is die ervaring van heiligmaking gering. Heiligmaking is eenvoudig die wonderbaarlike uitdrukking van die vergifnis van sondes in ’n menslike lewe, maar die ding wat die diepste bron van dankbaarheid in ’n mens wakker maak is dat God sonde vergewe het. Paulus het nooit hiervan weggekom nie. Wanneer u eenmaal besef wat dit God alles gekos het om u te vergewe, sal u soos in ’n bankschroef vasgehou word, gedring deur die liefde van God.