WAT IS ’N SENDELING?

’n Sendeling is iemand wat deur Jesus Christus gestuur word soos Hy deur God gestuur is. Die groot oorheersende noot is nie die behoeftes van mense nie, maar die bevel van Jesus. Die bron van ons inspirasie in werk vir God is agter ons, nie voor ons nie. Die neiging vandag is om die inspirasie voor ons te plaas, om alles voor ons weg te vee en dit alles tot ons opvatting van sukses uit te bring. In die Nuwe Testament word die inspirasie agter ons geplaas, die Here Jesus. Die ideaal is om aan Hom getrou te wees, om Sy ondernemings uit te voer.

Persoonlike gehegtheid aan die Here Jesus en Sy standpunt is die een ding wat nie oor die hoof gesien mag word nie. In ’n sendingonderneming is die groot gevaar dat God se roeping deur die behoeftes van die mense uitgewis word totdat menslike meegevoel die betekenis daarvan om deur Jesus gestuur te wees absoluut oorweldig. Die behoeftes is so enorm, die toestande so verwarrend, dat elke vermoë van die denke wankel en faal. Ons vergeet dat die een groot rede onderliggend aan alle sendingondernemings nie eerstens die verheffing van die mense is nie, ook nie die opvoeding van die mense nie, ook nie hulle behoeftes nie; maar allereers die bevel van Jesus Christus — "Gaan dan heen, en onderrig al die nasies."

Wanneer ons terugkyk na die lewens van manne en vroue van God is die neiging om te sê — Watter wonderbaarlik skerpsinnige wysheid het hulle gehad! Hoe volmaak het hulle alles verstaan wat God wou hê! Die skerpsinnige Denke daaragter is die Denke van God, glad nie menslike wysheid nie. Ons gee menslike wysheid die eer terwyl ons die Goddelike leiding van God die eer behoort te gee deur kinderlike mense wat dwaas genoeg was om God se wysheid en die bonatuurlike toerusting van God te vertrou.