DIE UITSLUITLIKHEID VAN CHRISTUS

Is dit nie vernederend om gesê te word dat ons na Jesus moet kom nie! Dink aan die dinge waarmee ons nie na Jesus Christus toe wil kom nie. As u wil weet hoe werklik u is, toets uself aan hierdie woorde — "Kom na My toe." In elke mate waarin u nie werklik is nie, sal u eerder teëstribbel as kom, eerder haarkloof as kom, eerder deur droefheid gaan as kom, u sal enigiets doen eerder as om die laaste skof van onuitspreeklike dwaasheid af te lê — "Net soos ek is[1]." Solank u die geringste bietjie geestelike aanmatiging het, sal dit hom altyd openbaar in die feit dat u verwag dat God vir u moet sê om ’n groot ding te doen, terwyl al wat Hy vir u sê om te doen is om te "kom."

"Kom na My toe." U sal wanneer u daardie woorde hoor weet dat iets in u moet gebeur voordat u kan kom. Die Heilige Gees sal u wys wat u moet doen, enigiets hoegenaamd wat die byl aan die wortel sal lê van die ding wat verhinder dat u deurkom. U sal nooit verder kom voordat u gewillig is om daardie een ding te doen nie. Die Heilige Gees sal die een oninneembare ding in u aanwys, maar Hy kan dit nie verroer tensy u gewillig is om Hom toe te laat nie.

Hoe dikwels het u met u versoeke na God gekom en weggegaan met die gevoel — Ag, wel, hierdie keer het ek dit gedoen! En tog gaan u met niks weg nie, terwyl God die hele tyd met uitgestrekte hande gestaan het nie alleen om u aan te neem nie, maar dat u Hom moet aanneem. Dink aan die onoorwinlike, onbedwingbare, onvermoeibare geduld van Jesus — "Kom na My toe."

[1] Die Engelse ‘Just as I am’ is ’n aanhaling uit die bekende gesang ‘Just As I Am’ deur Charlotte Elliott.