HEILIGMAKING
“Uit Hom is julle in Christus Jesus, wat deur God vir ons gemaak is tot . . . heiligmaking.”
1 Korintiërs 1:30
Die lewenskant.
Die geheimenis van heiligmaking is dat die volmaakthede van Jesus Christus aan my toebedeel word, nie geleidelik nie, maar onmiddellik wanneer ek deur geloof die verwesenliking binnegaan dat Jesus Christus vir my tot heiligmaking gemaak is. Heiligmaking beteken niks minder nie as dat die heiligheid van Jesus sigbaar myne gemaak word.
Die een wonderbare geheim van ’n heilige lewe lê nie in die nabootsing van Jesus nie, maar daarin om die volmaakthede van Jesus toe te laat om hulle in my sterflike vlees te openbaar. Heiligmaking is "Christus in julle." Dit is Sy wonderbare lewe wat in heiligmaking aan my toebedeel word, en deur geloof as ’n soewereine gawe van God se genade toebedeel word. Is ek gewillig dat God heiligmaking net so werklik in my maak as wat dit in Sy Woord is?
Heiligmaking beteken die toebedeling van die Heilige eienskappe van Jesus Christus. Dit is Sy geduld, Sy liefde, Sy heiligheid, Sy geloof, Sy reinheid, Sy godsvrug, wat in en deur elke geheiligde siel geopenbaar word. Heiligmaking is nie om die krag om heilig te wees uit Jesus te put nie; dit is om die heiligheid wat in Hom geopenbaar is uit Jesus te put, en Hy openbaar dit in my. Heiligmaking is ’n toebedeling, nie ’n nabootsing nie. Nabootsing loop op ’n ander lyn. In Jesus Christus is die volmaaktheid van alles, en die geheimenis van heiligmaking is dat al die volmaakthede van Jesus tot my beskikking is, en stadig maar seker begin ek ’n lewe van onuitspreeklike orde en geestesgesondheid en heiligheid leef: "Deur die krag van God bewaar."