DIE GEHEIMENIS VAN GLO

Deur die wonder van die Verlossing is Saulus van Tarsus in een sekonde van ’n sterk-willige, intense Fariseër verander in ’n nederige, toegewyde slaaf van die Here Jesus.

Daar is niks wonderbaarliks aan die dinge wat ons kan verklaar nie. Ons beheers wat ons in staat is om te verklaar, gevolglik is dit natuurlik om te probeer verklaar. Dit is nie natuurlik om gehoorsaam te wees nie; en dit is ook nie noodwendig sondig om ongehoorsaam te wees nie. Daar is geen morele deug in gehoorsaamheid tensy daar ’n erkenning van ’n hoër gesag is in die een wat voorskryf nie. Dit is moontlik ’n bevryding vir die ander persoon as hy nie gehoorsaam nie. As een mens vir ’n ander sê — 'Jy moet,' en — 'Jy sal,' breek hy die menslike gees en maak hy dit vir God ongeskik. ’n Mens is ’n slaaf deur te gehoorsaam tensy daar agter sy gehoorsaamheid ’n erkenning van ’n heilige God is. Menige siel begin na God kom wanneer hy godsdienstig-wees afwerp, omdat daar slegs een Meester van die menslike hart is, en dit is nie godsdiens nie maar Jesus Christus. Maar wee my as ek wanneer ek Hom sien sê — Ek wil nie. Hy sal nooit daarop aandring dat ek dit doen nie, maar ek het begin om die doodsvonnis van die Seun van God in my siel te onderteken. Wanneer ek van aangesig tot aangesig met Jesus Christus staan en sê — Ek wil nie, sal Hy nooit aandring nie; maar ek beweeg agteruit weg van die herskeppende krag van Sy Verlossing. Vir God se genade maak dit geen verskil hoe afskuwelik ek is as ek na die lig kom nie; maar wee my as ek die lig weier (sien Johannes 3:19-21).