DIE GROOT DEURPEILING

Het u die geringste vertroue op enigiets anders as God? Is daar ’n oorblyfsel van vertroue op enige natuurlike deug, enige stel omstandighede? Vertrou u in enige bepaalde opsig op uself in hierdie nuwe voorstel wat God aan u voorgelê het? Dit is wat die deurpeiling beteken. Dit is heeltemal waar om te sê — "Ek kan nie ’n heilige lewe lei nie," maar u kan besluit om Jesus Christus toe te laat om u heilig te maak. "Julle kan die Here God nie dien nie"; maar u kan uself op die plek stel waar God se almagtige krag deur u heen sal kom. Is u in so ’n mate reg met God dat u verwag dat Hy Sy wonderbare lewe in u openbaar?

"Nee, maar ons sal die Here dien." Dit is nie ’n impuls nie, maar ’n doelbewuste verbintenis. U sê — Maar God kon my nooit hiertoe geroep het nie, ek is te onwaardig, dit kan nie my beteken nie. Dit beteken wel u, en hoe swakker en kragteloser u is, hoe beter. Die een wat iets het om op te vertrou is die laaste een wat enigsins daartoe kom om te sê — "Ek sal die Here dien."

Ons sê — "As ek werklik kon glo!" Die punt is — As ek werklik wil glo. Geen wonder dat Jesus Christus soveel nadruk op die sonde van ongeloof lê nie. "En Hy het daar nie baie kragtige werke gedoen nie vanweë hulle ongeloof." As ons werklik geglo het dat God bedoel wat Hy gesê het — hoe sou ons wees! Durf ek God werklik vir my alles laat wees wat Hy sê Hy sal wees?