DIENS VAN HARTSTOGTELIKE TOEGEWYDHEID

Jesus het nie gesê — Maak bekeerlinge tot julle denkwyse nie, maar sien om na My skape, sorg dat hulle in die kennis van My gevoed word. Ons reken as diens wat ons in die weg van Christelike werk doen; Jesus Christus noem diens wat ons vir Hom is, nie wat ons vir Hom doen nie. Dissipelskap is gegrond op toewyding aan Jesus Christus, nie op aanhang aan 'n opvatting of 'n geloofsoortuiging en geloofsbelydenis nie. "As iemand na My kom en nie haat nie . . ., kan hy nie My dissipel wees nie." Daar is geen argument en geen dwang nie, maar bloot — As u My dissipel wil wees, moet u aan My toegewy wees. 'n Mens wat deur die Gees van God aangeraak word sê skielik — "Nou sien ek Wie Jesus is," en dit is die bron van toewyding.

Vandag het ons belydenisgeloof in die plek van persoonlike geloof gestel, en dit is waarom so baie aan sake toegewy is en so min aan Jesus Christus toegewy is. Mense wil nie aan Jesus toegewy wees nie, maar slegs aan die saak wat Hy begin het. Jesus Christus is 'n bron van diepe aanstoot vir die opgevoede denke van vandag wat Hom op geen ander wyse as 'n Kameraad wil hê nie. Ons Here se eerste gehoorsaamheid was aan die wil van Sy Vader, nie aan die behoeftes van mense nie; die redding van mense was die natuurlike uitkoms van Sy gehoorsaamheid aan die Vader. As ek slegs aan die saak van die mensdom toegewy is, sal ek gou uitgeput wees en by die plek kom waar my liefde sal wankel; maar as ek Jesus Christus persoonlik en hartstogtelik liefhet, kan ek die mensdom dien al behandel mense my soos 'n deurmat. Die geheim van 'n dissipel se lewe is toewyding aan Jesus Christus, en die kenmerk van die lewe is sy onopvallendheid. Dit is soos 'n koringkorrel, wat in die grond val en sterf, maar weldra sal dit opspring en die hele landskap verander (Johannes 12:24).