DIE BOTSING VAN GOD EN SONDE
“Wat Self ons sondes in Sy eie liggaam aan die kruishout gedra het.”
1 Petrus 2:24
Die Kruis van Jesus is die openbaring van God se oordeel oor sonde. Moet nooit die gedagte van martelaarskap omtrent die Kruis van Jesus Christus duld nie. Die Kruis was 'n voortreflike triomf waarin die fondamente van die hel geskud is. Daar is niks sekerder in Tyd of Ewigheid as wat Jesus Christus aan die Kruis gedoen het nie: Hy het die hele menslike geslag teruggeskakel in 'n regte verhouding met God. Hy het Verlossing die grondslag van die menslike lewe gemaak, dit wil sê, Hy het 'n weg gemaak vir elke mensekind om in gemeenskap met God te kom.
Die Kruis het nie met Jesus gebeur nie: Hy het doelbewus daarvoor gekom. Hy is "die Lam wat van die grondlegging van die wêreld af geslag is." Die hele betekenis van die Menswording is die Kruis. Waak daarteen om God wat in die vlees geopenbaar is te skei van die Seun wat sonde geword het. Die Menswording was met die doel van Verlossing. God het vlees geword met die doel om sonde weg te doen; nie met die doel van Selfverwesenliking nie. Die Kruis is die middelpunt van Tyd en van Ewigheid, die antwoord op albei se raaisels.
Die Kruis is nie die kruis van 'n mens nie maar die Kruis van God, en die Kruis van God kan nooit in menslike ervaring verwesenlik word nie. Die Kruis is die uitstalling van die natuur van God, die poort waardeur enige individu van die menslike geslag in eenheid met God kan ingaan. Wanneer ons by die Kruis kom, gaan ons nie daardeur nie; ons bly in die lewe waartoe die Kruis die poort is.
Die middelpunt van redding is die Kruis van Jesus, en die rede waarom dit so maklik is om redding te verkry is omdat dit God so veel gekos het. Die Kruis is die punt waar God en die sondige mens met 'n botsing saamsmelt en die weg na die lewe geopen word — maar die botsing is op die hart van God.