HET U DIE HERE SE SEER GEVOEL?
“Jesus het vir hom die derde maal gesê, Het jy My lief?”
Johannes 21:17
Het u die Here se seer gevoel tot op die blootgelegde lewe van die nael[1], die plek waar die werklike gevoeligheid van u lewe gehuisves is? Die duiwel maak nooit daar seer nie, nóg sonde nóg menslike toegeneentheid maak daar seer, niks dring tot daardie plek deur behalwe die Woord van God nie. "Petrus was bedroef omdat Jesus die derde maal vir hom gesê het. . . ." Hy het wakker geword vir die feit dat hy in die werklike ware middelpunt van sy persoonlike lewe aan Jesus toegewy was, en hy het begin sien wat die geduldige ondervraging beteken het. Daar het nie die geringste draad van misleiding in Petrus se denke oorgebly nie, hy kon nooit weer mislei word nie. Daar was geen ruimte vir hartstogtelike uiting nie, geen ruimte vir uitgelatenheid of sentiment nie. Dit was vir hom ’n openbaring om te besef hoeveel hy die Here wel liefgehad het, en met verbasing het hy gesê — "Here, U weet alles." Petrus het begin sien hoeveel hy Jesus wel liefgehad het; maar hy het nie gesê nie — "Kyk na dit of dat om dit te bevestig." Petrus het aan homself begin ontdek hoeveel hy die Here wel liefgehad het, dat daar niemand in die hemel daarbo of op die aarde daaronder buiten Jesus Christus was nie; maar hy het dit nie geweet totdat die deurdringende, seermakende vrae van die Here gekom het nie. Die Here se vrae openbaar my altyd aan myself.
Die geduldige direktheid en vaardigheid van Jesus Christus met Petrus! Ons Here vra nooit vrae voordat die regte tyd gekom het nie. Selde, maar waarskynlik eenmaal, sal Hy ons in ’n hoek kry waar Hy ons met Sy onwykbare vrae sal seermaak, en ons sal besef dat ons Hom veel dieper liefhet as wat enige belydenis ooit kan toon.
[1] Die Engelse quick verwys hier konkreet na die lewende, uiters gevoelige weefsel onder die groeiende nael. Die ongewone formulering behou daarom die naelbeeld waarop Chambers se beskrywing van die diepste gevoeligheid berus.