DIE OORMEESTERENDE MAJESTEIT VAN PERSOONLIKE KRAG

Paulus sê dat hy oorheers, oormeester, en soos in ’n bankschroef vasgehou word, deur die liefde van Christus. Baie min van ons weet wat dit beteken om deur die liefde van God in ’n greep vasgehou te word; ons word slegs deur die dwang van ons ervaring vasgehou. Die een ding wat Paulus vasgehou het, totdat daar niks anders op sy horison was nie, was die liefde van God. "Die liefde van Christus dwing ons" — wanneer u daardie toon in ’n man of vrou hoor, kan u u nooit vergis nie. U weet dat die Gees van God ’n ongehinderde weg in daardie lewe kry.

Wanneer ons uit die Gees van God wedergebore word, gaan die toon van getuienis oor wat God vir ons gedoen het, en tereg. Maar die doop met die Heilige Gees wis dit vir altyd uit, en ons begin besef wat Jesus bedoel het toe Hy gesê het — "Julle sal getuies van My wees." Nie getuies van wat Jesus kan doen nie — dit is ’n elementêre getuienis — maar "getuies van My." Ons sal alles wat gebeur aanvaar as iets wat met Hom gebeur, of dit lof of blaam, vervolging of aanprysing is. Niemand wat nie deur die majesteit van Sy persoonlike krag gedwing word nie kan so vir Jesus Christus staan. Dit is die enigste ding wat saak maak, en die vreemde ding is dat dit die laaste ding is wat die Christelike arbeider besef. Paulus sê dat die liefde van God hom vasgryp, daarom handel hy soos hy handel. Mense mag hom waansinnig of nugter noem, maar hy gee nie om nie; daar is net een ding waarvoor hy lewe, en dit is om mense van die regterstoel van God, en van die liefde van Christus te oortuig. Hierdie teuellose oorgawe aan die liefde van Christus is die een ding wat in die lewe vrug dra, en dit sal altyd die indruk van die heiligheid en van die krag van God nalaat, nooit van ons persoonlike heiligheid nie.