WAARNA KYK EK?
“Kyk na My, en word gered.”
Jesaja 45:22
Verwag ons dat God met Sy seëninge na ons toe kom en ons red? Hy sê — Kyk na My, en word gered. Die groot geestelike moeilikheid is om op God te konsentreer, en dit is Sy seëninge wat dit moeilik maak. Moeilikhede laat ons byna altyd na God kyk; Sy seëninge is geneig om ons elders te laat kyk. Die lering van die Bergpredikasie is, in werklikheid — Vernou al u belangstellings totdat die houding van denke en hart en liggaam konsentrasie op Jesus Christus is. "Kyk na My."
Baie van ons het ’n verstandelike opvatting van wat ’n Christen behoort te wees, en die lewens van die heiliges word ’n hindernis vir ons konsentrasie op God. Daar is geen redding op hierdie wyse nie, dit is nie eenvoudig genoeg nie. "Kyk na My" en — nie "u sal gered word," nie maar "u is gered." Die einste ding waarna ons soek, sal ons vind as ons op Hom konsentreer. Ons raak in beslag geneem en nukkerig teenoor God, terwyl Hy die hele tyd sê — "Kyk op en word gered." Die moeilikhede en beproewings — die rondsoek in ons denke na wat ons hierdie somer, of môre, sal doen verdwyn almal wanneer ons na God kyk.
Wek uself op en kyk na God. Bou u hoop op Hom. Dit maak nie saak of daar honderd-en-een dinge is wat druk nie, sluit hulle almal vasberade uit en kyk na Hom. "Kyk na My," en redding is, die oomblik wat u kyk.