DEUR GOD GEROEP
“Wie sal Ek stuur, en wie sal vir Ons gaan? Toe sê ek, Hier is ek; stuur my.”
Jesaja 6:8
God het die roep nie tot Jesaja gerig nie; Jesaja het God hoor sê, "Wie sal vir Ons gaan?" Die roep van God is nie vir die besondere paar nie, dit is vir elkeen. Of ek God se roep hoor of nie hang van die toestand van my ore af; en wat ek hoor hang van my aard af. "Baie is geroep maar min is uitverkies," dit wil sê, min bewys hulself as die uitverkorenes. Die uitverkorenes is dié wat deur Jesus Christus in ’n verhouding met God gekom het waardeur hulle aard verander en hulle ore ontstop is, en hulle hoor die stil sagte stem wat voortdurend vra, "Wie sal vir Ons gaan?" Dit is nie ’n saak daarvan dat God ’n mens uitsonder en sê nie, "Nou, moet jy gaan." God het geen sterk dwang op Jesaja gelê nie; Jesaja was in die teenwoordigheid van God en hy het die roep gehoor, en het besef dat daar vir hom niks anders was as om te sê nie, in bewuste vryheid, "Hier is ek, stuur my." Kry die gedagte uit u denke om te verwag dat God met dwang en pleidooie sal kom. Toe ons Here Sy dissipels geroep het was daar geen onweerstaanbare dwang van buite nie. Die stille hartstogtelike aandrang van Sy "Volg My" is tot mense gespreek met elke vermoë wawyd wakker. As ons die Gees van God toelaat om ons van aangesig tot aangesig met God te bring, sal ons ook iets soortgelyks hoor aan wat Jesaja gehoor het, die stil sagte stem van God; en in volmaakte vryheid sal ons sê, "Hier is ek; stuur my."