DIE DAARNA VAN DIE LEWE VAN KRAG

"En nadat Hy dit gesê het, sê Hy vir hom, Volg My." Drie jaar tevore, het Jesus gesê — "Volg My," en Petrus het maklik gevolg, die bekoring van Jesus was op hom, hy het nie die Heilige Gees nodig gehad om hom te help om dit te doen nie. Toe het hy by die plek gekom waar hy Jesus verloën het, en sy hart het gebreek. Toe het hy die Heilige Gees ontvang, en nou sê Jesus weer — "Volg My." Daar is nou geen gestalte voor hom nie behalwe die Here Jesus Christus. Die eerste "Volg My" het niks mistieks in gehad nie, dit was ’n uiterlike navolging; nou is dit ’n navolging in innerlike martelaarskap (vgl. Johannes 21:18).

Tussen hierdie tye het Petrus Jesus met ede en vervloekings verloën, hy het aan die einde van homself en al sy selfgenoegsaamheid gekom, daar was nie een draad van homself waarop hy ooit weer sou steun nie, en in sy berooiing was hy in ’n geskikte toestand om ’n toebedeling van die opgestane Here te ontvang. "Hy blaas op hulle, en sê vir hulle, Ontvang julle die Heilige Gees." Ongeag watter veranderinge God in u bewerk het, moet u nooit daarop steun nie, bou alleen op ’n Persoon, die Here Jesus Christus, en op die Gees wat Hy gee.

Al ons geloftes en voornemens eindig in verloëning omdat ons geen krag het om hulle uit te voer nie. Wanneer ons aan die einde van onsself gekom het, nie in die verbeelding nie maar werklik, is ons in staat om die Heilige Gees te ontvang. "Ontvang julle die Heilige Gees" — die gedagte is dié van ’n inval. Daar is nou slegs een gidsster in die lewe, die Here Jesus Christus.