"FUTHI YONKE IMFANELO ENHLE ESINAYO"
“Yonke imithombo yami emisha iyoba kuWena.”
AMahubo 87:7 (P.B.V.)
INkosi yethu ayizichibiyeli nakanye izimfanelo zethu ezinhle zemvelo, Yena wenza kabusha wonke umuntu ngaphakathi. "Yembathani umuntu omusha," okungukuthi, qinisekisani ukuthi ukuphila kwenu kobuntu okungokwemvelo kwembatha ingubo evumelana nokuphila okusha. Ukuphila uNkulunkulu akutshalayo ngaphakathi kwethu kuveza izimfanelo zako ezinhle, akuzona izimfanelo zika-Adamu kodwa ezikaJesu Kristu. Buka indlela uNkulunkulu ayokomisa ngayo ukwethemba kwakho izimfanelo ezinhle zemvelo emva kokungcweliswa, nanoma yimaphi amandla onawo, uze ufunde ukuthola ukuphila kwakho endaweni egcina ukuphila kokuvuka kukaJesu. Bonga uNkulunkulu uma udlula ekuhlangenwe nakho kokomiswa!
Uphawu lokuthi uNkulunkulu uyasebenza ngaphakathi kwethu ukuthi Yena wonakalisa ukwethemba izimfanelo ezinhle zemvelo, ngoba azisizo izithembiso zalokho esiyoba yikho, kodwa ziyizinsalela zalokho uNkulunkulu adala umuntu ukuba abe yikho. Siyonamathela ezimfanelweni ezinhle zemvelo, kuyilapho sonke isikhathi uNkulunkulu ezama ukusihlanganisa nokuphila kukaJesu Kristu okungenakuchazwa nakanye ngezimfanelo ezinhle zemvelo. Kuyinto edabukisa kakhulu ukubona abantu enkonzweni kaNkulunkulu bencike kulokho umusa kaNkulunkulu ongazange ubanike kona, bencike kulokho abanakho ngengozi yofuzo. UNkulunkulu akakhi izimfanelo zethu ezinhle zemvelo aziguqule, ngoba izimfanelo zethu zemvelo azisoze zasondela kulokho uJesu Kristu akufunayo. Alukho uthando lwemvelo, akukho ukubekezela kwemvelo, akukho ukuhlanzeka kwemvelo okungake kufinyelele kulokho Yena akufunayo. Kodwa lapho siletha yonke ingxenye yokuphila komzimba wethu ekuvumelaneni nokuphila okusha uNkulunkulu akufake ngaphakathi kwethu, Yena uyobonisa ngaphakathi kwethu izimfanelo ezinhle ezaziyisici seNkosi uJesu.
"Futhi yonke imfanelo enhle esinayo
ingeyaKhe yedwa."