UKULUNGISISWA NGOKHOLO
“Ngokuba uma, lapho siseyizitha, sabuyisana noNkulunkulu ngokufa kweNdodana yaKhe, kakhulu-ke, sesibuyisene, siyakusindiswa ngokuphila kwaKhe.”
KwabaseRoma 5:10
Angisindiswa ngenxa yokukholwa; ngokukholwa ngiyaqaphela ukuthi ngisindisiwe. Akusikho ukuphenduka okungisindisayo, ukuphenduka kuwuphawu lokuthi ngiyaqaphela lokho uNkulunkulu akwenzile kuKristu Jesu. Ingozi iwukugcizelela umphumela esikhundleni sembangela. Yikulalela kwami okungenza ngilunge kuNkulunkulu, ukuzinikezela kwami. Nakanye! Ngibekwa ebudlelwaneni obulungile noNkulunkulu ngoba ngaphambi kwakho konke, uKristu wafa. Lapho ngiphendukela kuNkulunkulu futhi ngokukholwa ngamukela lokho uNkulunkulu akwembulayo njengento engingayamukela, masinyane umsebenzi omkhulu wokubuyisana kaJesu Kristu ungiphuthumisa ebudlelwaneni obulungile noNkulunkulu; futhi ngesimangaliso esingaphezu kwemvelo somusa kaNkulunkulu ngimi ngilungisisiwe, hhayi ngoba ngidabukile ngesono sami, hhayi ngoba ngiphendukile, kodwa ngenxa yalokho uJesu akwenzile. UMoya kaNkulunkulu uletha lokhu ngokukhanya okuqhamukayo, okugcwala yonke indawo, futhi ngiyazi, nakuba ngingazi ukuthi kanjani, ukuthi ngisindisiwe.
Insindiso kaNkulunkulu ayisekelwe ekucabangeni okunengqondo kwabantu, isekelwe ekufeni kukaJesu okungumhlatshelo. Singazalwa kabusha ngenxa yomsebenzi wokubuyisana weNkosi yethu. Amadoda nabesifazane abayizoni bangaguqulwa babe izidalwa ezintsha, hhayi ngokuphenduka kwabo noma ukukholwa kwabo, kodwa ngomsebenzi omangalisayo kaNkulunkulu kuKristu Jesu owandulela konke okuhlangenwe nakho. Ukulondeka okungenakunqotshwa kokulungisiswa nokungcweliswa nguNkulunkulu uqobo. Akudingeki sizifeze ngokwethu lezi zinto; sezifezwe ngumsebenzi wokubuyisana. Okungaphezu kwemvelo kuba ngokwemvelo ngesimangaliso sikaNkulunkulu; kuba khona ukuqaphela lokho uJesu Kristu asekwenzile — "Kufeziwe."