UKHIYE WOKUZINIKELA KWESITHUNYWA SEVANGELI
“Ngenxa yeGama laKhe baphuma.”
3 KaJohane 7
INkosi yethu isitshelile indlela uthando lwethu ngaYe okufanele luzibonakalise ngayo. "Uyangithanda na?" "Yondla izimvu zaMi" — zihlanganise nezithakazelo zaMi kubantu abanye, hhayi okuphambene nalokho, ukuhlanganisa Mina nezithakazelo zakho kubantu abanye. Ku-1 KwabaseKhorinte 13:4-8 kunikezwa isimilo salolu thando, luwuthando lukaNkulunkulu oluzivezayo. Isivivinyo sothando lwami ngoJesu singesokwenza ngokoqobo, konke okunye kuyinkulumo eyize egcwele imizwa.
Ukwethembeka kuJesu Kristu kuwumsebenzi ongaphezu kwemvelo wokuhlengwa owenziwa kimi nguMoya oNgcwele othululela kabanzi uthando lukaNkulunkulu enhliziyweni yami, futhi lolo thando lusebenza ngendlela eletha umphumela ngami lapho ngihlangana nawo wonke umuntu. Ngihlala ngithembekile eGameni laKhe nakuba wonke amaqiniso engqondo ephusile emphikisa, futhi ethi akanamandla angaphezu kwenkungu yasekuseni.
Ukhiye wokuzinikela kwesithunywa sevangeli usho ukunganamatheli entweni noma kumuntu ngaphandle kweNkosi yethu uqobo, hhayi ukuzihlukanisa nezinto ngaphandle. INkosi yethu yayingena iphuma ngokumangalisayo phakathi kwezinto ezivamile; ukuzihlukanisa kwaKhe kwakungaphakathi kubheke kuNkulunkulu. Ukuzihlukanisa kwangaphandle kuvame ukuba uphawu lokunamathela kwangasese okunamandla kulezo zinto esiziqhelelanisa nazo ngaphandle.
Ukwethembeka kwesithunywa sevangeli kungukugcina umphefumulo waso uvulekele ngokugxilile emvelweni yeNkosi uJesu Kristu. Amadoda nabesifazane iNkosi yethu ebathumela emisebenzini yaKhe bangabantu abavamile, futhi banokuzinikela okubusayo kuYe okwenziwe nguMoya oNgcwele.