UKUQAPHELA UBIZO
“Ngokuba isibopho sibekwe phezu kwami: yebo, maye kimi, uma ngingalishumayeli ivangeli!”
1 KwabaseKhorinte 9:16
Sivame ukukhohlwa ukuthinta kukaNkulunkulu okuyimfihlakalo, okungaphezu kwemvelo. Uma ungachaza ukuthi walutholaphi ubizo lukaNkulunkulu nakho konke ngalo, ngiyangabaza ukuthi wake waba nalo yini ubizo. Ubizo lukaNkulunkulu alufiki kanjalo, kuningi kakhulu kulo okungaphezu kwemvelo. Ukuluqaphela ekuphileni komuntu kungafika njengokuduma kwezulu okungazelelwe noma njengokusa okuntwela kancane kancane, kodwa kungakhathaliseki ukuthi lufika kanjani, lufika nomfutho ocashile wamandla angaphezu kwemvelo, into engenakubekwa ngamazwi, futhi luhlale luhambisana nokukhanya. Noma nini kungase kuqhume ukuqaphela okungazelelwe kwalolu bizo olungenakulinganiswa, olungaphezu kwemvelo, olumangalisayo olubambe ukuphila kwakho — "Nginikhethile." Ubizo lukaNkulunkulu aluphathelene nensindiso nokungcweliswa. Akukhona ukuthi ngenxa yokungcweliswa kwakho usubizelwe ukushumayela ivangeli; ubizo lokushumayela ivangeli luhluke ngokungenakulinganiswa. UPawulu uluchaza njengesibopho esibekwe phezu kwakhe.
Uma ubulokhu ucima ubizo lukaNkulunkulu olukhulu olungaphezu kwemvelo ekuphileni kwakho, buyekeza izimo zakho ubone lapho kungeyena uNkulunkulu obekwe kuqala khona, kodwa kube yimibono yakho ngenkonzo, noma amakhono avela esimweni sakho semvelo. UPawulu wathi — "Maye kimi, uma ngingalishumayeli ivangeli!" Wayeluqaphele ubizo lukaNkulunkulu, futhi kwakungekho okunye okwakuncintisana namandla akhe.
Uma owesilisa noma owesifazane ebizwe nguNkulunkulu, akunandaba ukuthi izimo zimelene kangakanani naye, wonke amandla abelokhu esebenza ekugcineni ayosebenzela injongo kaNkulunkulu. Uma uvumelana nenjongo kaNkulunkulu Yena ngeke avumelanise nayo ukuphila kwakho okuqaphelayo kuphela, kodwa nazo zonke izingxenye ezijulile zokuphila kwakho, lezo ongakwazi ukuzifinyelela.