UMYALO OTHI "HAMBA" WOKUZIHLOBANISA NGOKUNGENAMIBANDELA
“Yinye into oyiswele: . . . woza, uthwale isiphambano, ungilandele.”
NgokukaMakhu 10:21
Umbusi ocebile osemusha wayenentshiseko ebusa konke yokuba ophelele. Lapho ebona uJesu Kristu, wafuna ukufana naYe. INkosi yethu ayibeki ubungcwele bomuntu siqu phambili lapho ibiza umfundi; ibeka ukuqedwa ngokuphelele kwelungelo lami phezu kwami nokuzihlanganisa naYe — ubudlelwane naYe obungavumeli obunye ubudlelwane. NgokukaLuka 14:26 akuphathelene nensindiso noma ukungcweliswa, kodwa kuphathelene nokuzihlobanisa noJesu Kristu okungenamibandela. Bambalwa kakhulu kithi abawazi ngokuphelele umyalo othi "Hamba" wokuzinikela ngokuphelele kuJesu.
"Khona uJesu wambheka wamthanda." Ukubheka kukaJesu kuyosho inhliziyo ehlukaniswe unomphela ekwethembekeni kunoma yimuphi omunye umuntu noma into. Ingabe uJesu wake wakubheka? Ukubheka kukaJesu kuyaguqula futhi kuhlaba kujule. Lapho "uthambile" khona kuNkulunkulu yilapho iNkosi ikubheke khona. Uma ulukhuni futhi uphindisela, uphikelela kweyakho indlela, uqiniseka ukuthi omunye umuntu cishe nguye onephutha kunawe, lokho kuyinkomba yokuthi kunezingxenye ezinkulu zemvelo yakho ezingakaze ziguqulwe ukubheka kwaKhe.
"Yinye into oyiswele . . ." Okuwukuphela "kwento enhle" ngokombono kaJesu Kristu kuwukuhlangana naYe kungabikho lutho phakathi.
"Thengisa konke onakho . . ." Kumelwe ngizehlise ngize ngibe umuntu nje ozaziyo, kumelwe ngidele ngokuyisisekelo impahla yazo zonke izinhlobo, hhayi ukuze ngisindise umphefumulo wami (yinye kuphela into esindisa umuntu — ukuthembela ngokuphelele kuJesu Kristu) — kodwa ukuze ngilandele uJesu. "Woza, ungilandele." Futhi indlela iyona Yena ayihamba.