LOKHO OKUMELWE UKUDELE
“Kodwa sizilahlile izinto ezifihlekile zokungathembeki.”
2 KwabaseKhorinte 4:2
Ingabe "uzilahlile izinto ezifihlekile zokungathembeki" — izinto umuzwa wakho wokuhlonipheka ongavumi ukuba zivezwe ekukhanyeni? Ungazifihla kalula. Ingabe enhliziyweni yakho kukhona umcabango ngomuntu othile ongeke uthande ukuba lowo mcabango udonselwe ekukhanyeni? Wulahle masinyane nje lapho uvela; yilahle yonke le ndaba kuze kungabikho lutho olufihlekile lokungathembeki noma lobuqili kuwe. Umona, isikhwele, ukuxabana — lezi zinto aziveli ngaso sonke isikhathi esimweni sesono, kodwa zingavela ekwakhekeni komzimba wakho owake wasetshenziselwa lolu hlobo lwento ezinsukwini ezedlule (bheka KwabaseRoma 6:19 kanye no-1 KaPhethro 4:1-2). Hlala uqaphile njalo ukuze kungaveli lutho ekuphileni kwakho ongaba namahloni ngalo.
"Ukungahambi ngobuqili," okungukuthi, ukusebenzisa lokho okuzokwenza uthole okufunayo. Lolu ugibe olukhulu. Uyazi ukuthi uNkulunkulu uyokuvumela ukuba usebenze ngendlela eyodwa kuphela, ngakho qaphela ukuba ungalokothi ubambe abantu ngenye indlela; isiqalekiso sikaNkulunkulu siyokwehlela uma wenza kanjalo. Abanye benza izinto ebeziyoba ukuhamba ngobuqili kuwe, kodwa kungenzeka zingabi njalo kubo: uNkulunkulu ukunike umbono ohlukile. Ungalokothi uthuntubeze ukuqaphela kwakho ukuthi konke okusemandleni akho kungokwalokho okuphakeme kakhulu kwaKhe. Ukwenza kwakho into ethile kungasho ukungena kobuqili ngenjongo engeyona ephakeme kakhulu, kanye nokuthuntubezeka kwesisusa uNkulunkulu akunike sona. Abaningi babuyele emuva ngoba besaba ukubuka izinto ngombono kaNkulunkulu. Isimo esikhulu esibucayi sifika ngokomoya lapho umuntu kufanele adlulele kancane ngalé kwesivumo sokholo asamukele.